İşğal etilgen Qırımda, Aqmescitniñ aylanma maşina yolunda altı insannıñ ölümi boyunсa cinaiy işniñ baqılması çerçivesinde yol açılğanınıñ aqiqiy tarihını ögrenecekler. Bunı oktâbr 2 künü Krıminformda keçirilgen konferentsiya devamında Qırım naqliyat «naziri» vazifelerini eda etken Anatoliy Tsurkin bildirdi.
«Resmiy vesiqada yazılğanı kibi, yol 2011 senesi oktâbr 4 künü açılğan», – dedi o.
Faqat jurnalistler 2010 senesi dekabr 20 Qırım Nazirler Şurası tantanalı sürette yolnı açqanı aqqında hatırlattılar. On ay devamında yol qanunsız sürette işletile edi.
«Eger de bu merasimden levhalar olsa, taqiqat komiteti bunı al eter», – dedi Tsurkin.
Al azırda yalıñız yolnı qurğan şirket bellidir.
Qırım.Aqiqat bergen malümatqa köre, sentâbr 28-de gece saat 03.30 Aqmescit-Nikolayevka aylanma yolunda yol örtüsü omradı – adamlarnen tolu VAZ maşinası çuqurğa oğradı. Altı insan, şu cümleden eki bala, elâk oldılar.
Kütleviy haber vastalarınıñ malümatına köre, Aqmescitte omrağan «Dubki-Levadki» yolu soñki beş yıl devamında Qırımnıñ eñ paalı qurucılıq obyektlerinden biri edi. PAO «Yujdorstroy» er daim yol qurucılıq imkânlarını qazana edi. Qırımda Rusiye Taqiqat komitetiniñ Baş taqiqat idaresi maşina yolunıñ omravı boyunca cinaiy iş açtı.
Qırımnıñ öz başına ilân etilgen «baş naziri» Sergey Aksönov yol omravını ögrenecek ükümet komissiyasını acele sürette meydanğa ketirmege emir etti ve vefat etkenlerniñ soy-soplarına 400-er biñ ruble berecegini vade etti.
Sentâbr 29-da saat 11-de Aqmescitniñ Borçoqraq (Fontanı) qasabasında Aqmescitniñ aylanma yolunda yüz bergen yol eşilüvi aqibetinde elâk olğan 37 yaşında Asiye Salimova ve onıñ 16 yaşında qızı Aliyeniñ cenaze merasimi olıp keçti.
Yol qazasında yaralanğan bir yaşında Selim oğlançıqnı sentâbr 29 künü Moskvağa ketirdiler. Oğlançıq essizdir.
