Qırımtatar milliy lideri Mustafa Cemilev avropalı parlamentariylerge Qırım işğali devamında Qırımda qırımtatarlarnıñ 18 vekili ğayıp olğanını bildirdi.
Bunı o, Avropa Şurasınıñ Parlament assambleyasınıñ toplaşuv salonında bildirdi, – haber ete Ukrinform.
«İşğal devamında 15 qırımtatarı ğayıp oldı, biz yalıñız bir cesetni tapıp oldıq. Keçken afta daa üçü ğayıp oldı. Şu cümleden, soñkisi – Edem Asanov sentâbr 29 künü Kezlevde ğayıp oldı. Yerli akimiyet bu insanlar aqqında iç bir malümat bermey», – dedi o.
Mustafa Cemilevniñ sözlerine köre, qırımtatar ealisine Qırımnıñ işğalci akimiyeti tarafından basım kösterile, bir çoq qırımtatarı, buña sebep olmadan, apiske alınğan.
«Qırım boyunca qırımtatarlar yaşağan evlerde, cami, oquv yurtlarında, kitaphanelerde tintüv dalğası yüz berdi. Soñki afta devamında 40-tan ziyade tintüv keçirildi», – qayd etti o.
Qırımtatarlarnıñ yetekçisi şunı da bildirdi ki, bütün dünyada tanılğan serbest uquq Qırımda iç te yoq eken.
«Üçten ziyade insan bir yerge kelse, qanunsız toplaşuv ola, bunı qattı para cezaları ile belgileyler», – dey o.
Bundan da ğayrı, dep tarif etti Mustafa Cemilev, yarımadada bütün serbest matbuat vastaları şimdi tsenzura altında ekenler.
Bunıñ ile qanunsız akimiyet qırımlılarnı yarımadadan quva ve Mustafa Cemilevge Qırımğa kirişni yasaq ete.
