Qırım «nazirler şurası» yanında ğayıp olğan qırımtatarlarnıñ qıdıruvı ile oğraşaycaq taqımnı teşkil etecekler.
Bunı oktâbr 1 künü Qırımnıñ öz başına tayin etilgen baş nazir Sergey Aksönov ile körüşken Qarasuvbazar rayonında Sarı Su qasabasında ğayıp olğan İslâm Cepparov ve Cevdet İslâmovnıñ baba ve dayısı Abdureşit Cepparov QHA agentligine bildirdi.
Abdureşit Cepparovnıñ aytqanı kibi, subet «mündericeli» edi.
«Nazirler şurası yanında qırımtatarlardan ibaret olğan qıdıruv taqımı teşkil etilecegini ayttı. Mında ğayıp olğan insanlarnıñ yaqınları, adliyeci, mütehassıslar, mahsus organlar ile munasebette bulunacaq insanlar kirecekler», – dep tarif etti o.
O şunı da bildirdi ki, işbu taqım daima insanlar ile körüşip, olarğa olğan malümatnı bildirecek eken.
Ğayıp olğanlarnıñ tuvğanlarına böyle bir taqım tahminen eki aftadan soñ teşkil etilecegini bildirdiler. Ğayıp olğan qırımtatarlarnıñ meselelerinden ğayrı, mında qırımtatar halqınıñ diger problemleri de çezilecektir.
Hatırlatamız, sentâbr 27-de Qarasuvbazar civarındaki Sarı-Su köyünde belgisiz şahıslar eki genç qırımtatarını maşinağa oturtıp, belgisiz bir yerge alıp kettiler.
Hırsızlanğan gençlerden birisiniñ babası birden Qarasuvbaza boyunca politsiya ve FSB bölügine muracaat etti, amma anda bundan haberleri olmağanlarını bildirdiler.
