Qırımtatar milliy Meclisi Qırımğa qırımtatarlarnıñ aqlarını nezaret etmek içün Birleşken milletler teşkilâtınıñ mahsus eyyetini yollamağa talap ete.
Bunı Kiyevde brifing devamında qırımtatar milliy Meclisiniñ reisi Refat Çubarov bildirdi, dep haber ete RBK-Ukraina.
«BMT-nıñ mahsus eyyetini acele sürette teşkil etmek kerek. Qırım sakinlerinden, jurnalist, uquq qorçalayıcılardan, yalıñız qırımatatarlardan degil de, qırım cemaatçılığınıñ çeşit qısımlarından kelgen malümat ve işğalci akimiyetniñ haber etkenleri bir-birinden ğayet farq ete», – dedi Çubarov.
Onıñ sözlerine köre, BMT çerçivesinde çeşit memleketlerde yaşağan tamır halqlarnıñ aqlarını nezaret etecek mahsus eyyet teşkil etilmekte eken.
Çubarov şunı da qayd etti ki, bu qarar sentâbr 22-23 künleri keçirilgen BMT tamır halqlarnıñ meseleleri boyunca umumdünya konferentsiyasında alındı eken.
