Sentâbr 28-de gece Aqmescit civarındaki aylanma yolunda omrav aqibetinde yüz bergen yol qazasında can bergen altı kişi ve eki zarar körgen adamnıñ aqrabaları oktâbr 1-de 3,2 million ruble miqdarında tazminatnı elde ettiler. Bu aqqında işğal etilgen Qırım Nazirler şurasınıñ reis muavini Dmitriy Polonskiy, dep haber ete Krıminform.
«Elâk olğan ve zarar körgenlerniñ qorantaları vade etilgeni kibi ödevlerni elde ettiler, yani er bir ölgen ve zarar körgen insanğa 400 biñ ruble berildi», – dedi o.
Malüm olğanı kibi, sentâbr 28-de gece saat 03.30 Aqmescit-Nikolayevka aylanma yolunda yol örtüsü omradı – adamlarnen tolu VAZ maşinası çuqurğa oğradı. Altı insan, şu cümleden eki bala, elâk oldılar.
Kütleviy haber vastalarınıñ malümatına köre, Aqmescitte omrağan "Dubki-Levadki" yolu soñki beş yıl devamında Qırımnıñ eñ paalı qurucılıq obyektlerinden biri edi. PAO «Yujdorstroy» er daim yol qurucılıq imkânlarını qazana edi. Qırımda Rusiye Taqiqat komitetiniñ Baş taqiqat idaresi maşina yolunıñ omravı boyunca cinaiy iş açtı.
Sentâbr 29-da Aqmescitteki Borçoqraq (Fontanı) qasabasında yol eşilüvi aqibetinde elâk olğan 37 yaşında ve onıñ 16 yaşında qızı Aliyeniñ cenaze merasimi olıp keçti.
Yol qazasında zarar körgen bir yaşında Salimni sentâbr 29-da aqşam Moskvağa alıp kettiler. Oğlançıq alâ daa özüne kelmedi.
