Link açıqlığı

Aksönov esir alınğan qırımtatarlarnıñ ana-babalarınen snayperler qoruğan binada körüşe


Sergey Aksönov

İşğal etilgen Qırımda tutıp esir alınğan İslâm Cepparov ve Cevdet İslâmovnıñ baba ve dayısınıñ evi yanında tahminen 300 insan toplaştı. Adamlar Qırımnıñ farqlı regionlarından keldiler, – dep haber ete QHA.

Bundan ğayrı, Sarı-Suğa Qırımtatar Milliy Meclisiniñ reis muavini Ahtem Çiygoz, Aluşta şeer reisiniñ muavini Enver Arpatlı, qırımtatar milliy areketiniñ vekili, Qırımtatar halqı Qurultayı Merkeziy saylav komissiyasınıñ reberi Zair Smedlâyev, Saq regional meclisiniñ reisi Eskender Bilâlov, qırımtatar milliy areketiniñ veteranı Vejdiye Kaşka, Qarasuvbazar regional meclisiniñ reisi Mustafa Araba keldiler.

Sarı-Suğa kelmege söz bergen Qırımnıñ öz başına ilân etilgen baş naziri Sergey Aksönov öyle de kelmedi. Bu arada o Qarasuvbazar rayon devlet memuriyetiniñ binasında qapalı körüşüv keçirmege qarar berdi.

QHA mühbiriniñ malümatına köre, körüşüvge yalıñız esir alınğan İslâmnıñ babası Abdureşit Cepparov, esir alınğan Cevdet İslâmovnıñ anası, Qarasuvbazar cami imamı Elvedin Ablâmitov, Enver Arpatlı ve Zair Smedlâyev davet etildi.

Qarasuvbazar rayon devlet memuriyetiniñ binasını uquq qoruyıcı organlarnıñ vekilleri imaye ete, bina damında snayperler buluna.

Hatırlatamız, sentâbr 27-de Qarasuvbazar civarındaki Sarı-Su köyünde belgisiz şahıslar eki genç qırımtatarını maşinağa oturtıp, belgisiz bir yerge alıp kettiler.

Hırsızlanğan gençlerden birisiniñ babası birden Qarasuvbaza boyunca politsiya ve FSB bölügine muracaat etti, amma anda bundan haberleri olmağanlarını bildirdiler.

XS
SM
MD
LG