Musulmanlarnıñ Qurban bayramı Qırımda raatlıq künü olaraq ilân etildi. Bundan sebep işğal etilgen yarımada sakinleri oktâbr 6-da raatlanacaqlar.
Bunı Qırım «baş naziriniñ muavini» Ruslan Balbek jurnalistlerge bildirdi.
Onıñ bildirgenine köre, Qırım «baş naziri» Sergey Aksönov imzalağan «buyruqqa» binaen, Qurban bayramınıñ birinci künü cumaertesi kününe rastkelgeni sebebinden raatlıq künü bazarertesi künü oktâbr 6-na keçirildi.
Balbek şunı qayd etti ki, Qırım akimiyeti musulman bayramlarını raatlıq künleri olaraq ilân etip, Qırım musulmanlarına olğan sayğılarını kösterdi.
Qurban bayramı – hacnıñ yekünlenmesini ifade etken islâm bayramıdır, onı Oraza bayramından 70 kün keçken soñ qayd eteler.
