Bücet esabına «Qırım baari» fotokitapnıñ neşiri aqqında ariza işğal etilgen Qırımnıñ içki siyaset, haber ve bağ «nazirligine» keldi. Bunı nazir muavini Yuliya Martınova bildirdi, – dep yaza Qırımnıñ öz başına tayin etilgen akimiyetine yaqın olğan Krıminform saytı.
Martınovayanıñ sözlerine köre, mahsus komissiya «içtimaiy ceetten müim neşirlerniñ ve edebiyat eserleriniñ bücet esabına basılması ile oğraşacaq».
Komissiya teşkil etilmesi aqqında Yuliya Martınova Qırımnıñ informatsion siyaset, bağ ve kütleviy alâqa «Devlet şurası» komitetiniñ birinci toplaşuvında ilân etti.
Onıñ sözlerine köre, içtimaiy edebiyatnıñ neşiri aqqında soñ qararnı neşir komissiyası alacaq.
