Link açıqlığı

Aqmescit civarında sentâbr 28 künü yüz bergen ve neticede 6 insannıñ ölümine ketirgen maşina qazasınıñ sebeplerini ögrengen komissiya toplaşuvında qaza olğan yol qısmınıñ gece-kündüz nezaretini temin etmege ve yol areketiniñ marşrutını belgilemege qarar alındı.

Bunı qırım «akimiyeti»niñ matbuat hızmeti bildire.

Qırım «baş naziri» Sergey Aksönov taqiqat boyunca komissiya qazanıñ bir qaç sebebini ögrengenini qayd etti.

«Bir qaç variant baqıla, şu cümleden yolnı qurğanlarnıñ tarafından emallıq ve vazife başında yapılğan qabaat. Bütün teşkerüvler keçmezden evel, bir şey aytmağa qıyın», – dep bildire Aksönovnıñ sözlerini matbuat hızmeti.

O şunı da qayd etti ki, taqiqat Qırım «prokuraturası» ile keçirile.

Qırım.Aqiqat bergen malümatqa köre, sentâbr 28-de gece saat 03.30 Aqmescit-Nikolayevka aylanma yolunda yol örtüsü omradı – adamlarnen tolu VAZ maşinası çuqurğa oğradı. Altı insan, şu cümleden eki bala, elâk oldılar.

Kütleviy haber vastalarınıñ malümatına köre, Aqmescitte omrağan «Dubki-Levadki» yolu soñki beş yıl devamında Qırımnıñ eñ paalı qurucılıq obyektlerinden biri edi. PAO «Yujdorstroy» er daim yol qurucılıq imkânlarını qazana edi. Qırımda Rusiye Taqiqat komitetiniñ Baş taqiqat idaresi maşina yolunıñ omravı boyunca cinaiy iş açtı.

Qırımnıñ öz başına ilân etilgen «baş naziri» Sergey Aksönov yol omravını ögrenecek ükümet komissiyasını acele sürette meydanğa ketirmege emir etti ve vefat etkenlerniñ soy-soplarına 400-er biñ ruble berecegini vade etti.

Sentâbr 29-da saat 11-de Aqmescitniñ Borçoqraq (Fontanı) qasabasında Aqmescitniñ aylanma yolunda yüz bergen yol eşilüvi aqibetinde elâk olğan 37 yaşında Asiye Salimova ve onıñ 16 yaşında qızı Aliyeniñ cenaze merasimi olıp keçti.

Yol qazasında yaralanğan bir yaşında Selim oğlançıqnı sentâbr 29 künü Moskvağa ketirdiler. Oğlançıq essizdir.

XS
SM
MD
LG