Qırımda müthiş yol qazasında zarar körgen balanı Moskvağa ketirdiler. Salim adlı oğlançıq deñişmegen ağır alda buluna, dep haber ettiler Moskvanıñ acele hirurgiya ve travmatologiya institutında, qayd ete Qırımnıñ öz başına tayin etilgen akimiyetine yaqın olğan Krıminform saytı.
«Oğlançıq (1 yıl 3 ay) deñişmegen ağır alda buluna, tizesi ile keldi, – dep qayd eteler institutta.– Bala pek ağır yaralandı, baş miyi zararlandı, şaqaq kemigi sındı, qursaq yarası bar ve ilâhre».
Balanı Aqmescitten sentâbr 29 künü çıqqan mahsus uçaq ile Moskvağa ketirdiler.
Qırım.Aqiqat bergen malümatqa köre, sentâbr 28-de gece saat 03.30 Aqmescit-Nikolayevka aylanma yolunda yol örtüsü omradı – adamlarnen tolu VAZ maşinası çuqurğa oğradı. Altı insan, şu cümleden eki bala, elâk oldılar.
Kütleviy haber vastalarınıñ malümatına köre, Aqmescitte omrağan «Dubki-Levadki» yolu soñki beş yıl devamında Qırımnıñ eñ paalı qurucılıq obyektlerinden biri edi. PAO «Yujdorstroy» er daim yol qurucılıq imkânlarını qazana edi. Qırımda Rusiye Taqiqat komitetiniñ Baş taqiqat idaresi maşina yolunıñ omravı boyunca cinaiy iş açtı.
Qırımnıñ öz başına ilân etilgen «baş naziri» Sergey Aksönov yol omravını ögrenecek ükümet komissiyasını acele sürette meydanğa ketirmege emir etti ve vefat etkenlerniñ soy-soplarına 400-er biñ ruble berecegini vade etti.
Yol qazasında can bergenlerniñ adları belli oldı. Qırım yolunda omrav sebepleri bir aydan soñ aydınlatılacaqtır.
