Aqmescitte qırımtatar milliy Meclis binasından Ukraina bayrağını tüşürdiler.
Bunı Qırım.Aqiqat saytına qırımtatar milliy Qurultayınıñ teftiş komissiya reberi Zair Smedlâyev bildirdi.
Bayraqnı kim tüşürdi, o, aytıp olamadı, amma Qırım «halq imayesiniñ» yardımı olğanını tahmin ete.
«Merdiven ile kelgen halq imayesiniñ vekilleri yaptı, dep tüşünem. Uquq qorçalayıcılar ise qorudılar. Daima olğanı kibi, hucur şeyler yüz bere. Ukraina bayrağı şimdilik yoqtır, amma ileride olacağına ümüt etem», – dedi Smedlâyev.
Qırımtatar milliy Meclis reisininñ muavini Ahtem Çiygoz Qırım.Aqiqat saytına bu haber onı şaşırtmağanını bildirdi.
«Bina qapalı, içinde biz yoqmız, kimse keder etip olamadı»,– dedi Çiygoz.
«Qırım» Fondı» hayriye teşkilâtınıñ başı Riza Şevkiyev politsiya anda işke başlağanını ve nezaret kamerası alınğanını qayd etti
Sentâbr 17 künü «Qırım» Fondı»nıñ başı Riza Şevkiyevge Fondnıñ binasında bulunğan bütün qırımtatar teşkilâtları binanı terk etmege mecbur olğanı aqqında qararnı oqudılar.
Bundan evel, sentâbr 16 künü, Meclis binasında tintüvler keçirildi. Olarnıñ neticesinde qırımtatar milliy Meclis toplaşuvlarınıñ protokolları, bilgisayarlar ve Ukraina halq deptutatı Mustafa Cemilevniñ şahsiy şeyleri tutıp alındı.
Sentâbr 19 künü qırımtatar milliy Meclis azaları binanı terk etmege mecbur oldılar.
Hatırlatamız, aprel 21 künü belgisiz şahıslar Aqmescitte yerleşken Meclis binasına ücüm etip, Ukraina bayrağını tüşürmege tırışqan ediler.
