Link açıqlığı

İşğal etilgen Qırım akimiyeti, qırımtatarlarnı tutıp esir aluvını «provokatsiya» dep adlay


Ahtem Çiygoz

Qırımtatar Milliy Meclisiniñ reis muavini Ahtem Çiygoz Rusiye prezidentiniñ Qırımdaki vekâletli temsilcisi Oleg Belaventsev ile sentâbr 29-da körüşti, subet bu künleri Qarasuvbazar civarındaki Sarı-Su köyünde tutıp esir alınğan qırımtatarlarnen bağlı edi. Bu aqqında Çiygoz Qırım.Aqiqat mühbirine bildirdi.

«Maña ATR telekanalındaki «Gravitatsiya» yayınından soñ telefon etip, körüşüvge davet ettiler. Men davetlerini qabul ettim», – dep ayttı Meclis reisiniñ muavini.

Körüşüvde Rusiye prezidentiniñ vekâletli temsilcisiniñ muavini, «Qırım Cumhuriyetiniñ» yolbaşçısı Sergey Aksönov ve Saq regional meclisiniñ reisi Eskender Belâlov bulundılar.

Çiygoznıñ malümatına köre, körüşüvde Qırımdaki soñki vaqialar añıldı.

Meclis reisiniñ muavini dedi ki, Rusiye akimiyeti Qarasuvbazar civarında eki genç qırımtatarını tutıp esir alınğanına alâqası olmağanını bildire, ve bunı «Qırımdaki vaziyetni bozmaq areketi» olaraq tanıy.

Qırım.Aqiqat bergen malümatqa köre, Qarasuvbazar civarında belgisiz şahıslar eki genç qırımtatarını maşinağa oturtıp, belgisiz bir yerge alıp kettiler.

Bu aqqında gençlerden biriniñ babası Abdureşit Cepparov bildirdi.

Onıñ aytqanına köre, vaqia bugün saat 19.00 Sarı-Su mikrorayonında olıp keçti.

Cepparov birden Qarasuvbaza boyunca politsiya ve FSB bölügine muracaat etti, amma anda bundan haberleri olmağanlarını bildirdiler.

Eki genç qırımtatarını tutıp esir alıp, oturtqan maşina mavı tüste Volkswagen Transporter, qayd etüv işareti 755, 82-nci regionğa ait.

Sentâbr 29-da Qarasuvbazar civarındaki Sarı-Su qasabasında esir alınğan qırımtatarlarnıñ evi yanında tahminen 50 insan toplaştı. Olarnıñ arasında yerli meclis reisi Mustafa Asaba ve Qarasuvbazar şeer reisi Albert Kangiyev bar ediler.

Abdureşit Cepparovnıñ aytqanına köre, Qırım parlamentiniñ spiker muavini Remzi İlyasov bu vaqia taqiqatını şahsen ögrenecegini bildirdi.

XS
SM
MD
LG