İşğal etilgen Aqyarda salı kününe qadar «Ukrtelekom» müşterileriniñ bağı ğayrıdan tiklenilecek.
Bu aqqında Aqyarnıñ bağ ve informatsion imkânlar idaresiniñ yolbaşçısı Vadim Dvorânenko bildirdi, dep haber ete Qırım «akimiyetiniñ» ruporı «Krıminform».
«Sevtelekom» hadimleri sentâbr 24-te «Ukrtelekom» hızmetlerinden marum qalğan 13 biñ müşteriden 7 biñ insanğa internet ağını berdi», – dep ayttı Dvorânenko. Onıñ bildirgenine köre, bunıñnen bağlı işler salı kününe qadar yekünlenecek, «Ukrtelekom» sabıq müşterileriniñ internet hızmetleri tolusınen kösterilecek.
PAO «Ukrtelekom» Aqyarda hızmetlerini toqtatqanı sebebinden şeer ükümetiniñ qararınen «Sevtelekom» müessisesi bağ hızmetlerini köstere ve internet bağını ğayrıdan tiklemege devam ete.
Qırım ve Aqyar boyunca Roskomnadzor idaresiniñ reberi Sergey Hudoleyniñ bildirgenine köre, «Ukrtelekom» Rusiyeniñ şirketi olaraq qayd etilgen «Naştelekom» şirketi ile bağ hızmetlerini berüv aqqında añlaşma tizdi.
