Link açıqlığı

Saat 11-de Aqmescitniñ Borçoqraq (Fontanı) qasabasında Aqmescitniñ aylanma yolunda yüz bergen yol eşilüvi aqibetinde elâk olğan 37 yaşında Asiye Salimova ve onıñ 16 yaşında qızı Aliyeniñ cenaze merasimi olıp keçti.

Qırım.Aqiqat mühbiriniñ malümatına köre, cenaze Borçoqraq qasabasında başlandı, soñra merhumlarnı «GİBDD» nezareti altında Aqmescitten «Abdal» mezarlığına alıp kettiler. Kolonnada tahminen 50 maşina bar edi.

Cenaze merasimine aman-aman 400 insan keldi.

Olarnıñ arasında Qırım ükümetiniñ baş nazir muavini Ruslan Balbek ve Milletlerara munasebetler ve sürgün olunğan grajdanlarnıñ işleri boyunca Qırım Devlet komitetiniñ yolbaşçısı Zaur Smirnov bar ediler.

Yol qazasında can bergenler Yedi Quyu rayonınıñ Qıdırlez (Voykovo) köyünde yaşay ediler.

Qırım.Aqiqat bergen malümatqa köre, sentâbr 28-de gece saat 03.30 Aqmescit-Nikolayevka aylanma yolunda yol örtüsü omradı – adamlarnen tolu VAZ maşinası çuqurğa oğradı. Altı insan, şu cümleden eki bala, elâk oldılar.

Kütleviy haber vastalarınıñ malümatına köre, Aqmescitte omrağan «Dubki-Levadki» yolu soñki beş yıl devamında Qırımnıñ eñ paalı qurucılıq obyektlerinden biri edi. PAO «Yujdorstroy» er daim yol qurucılıq imkânlarını qazana edi. Qırımda Rusiye Taqiqat komitetiniñ Baş taqiqat idaresi maşina yolunıñ omravı boyunca cinaiy iş açtı.

Qırımnıñ öz başına ilân etilgen «baş naziri» Sergey Aksönov yol omravını ögrenecek ükümet komissiyasını acele sürette meydanğa ketirmege emir etti ve vefat etkenlerniñ soy-soplarına 400-er biñ ruble berecegini vade etti.

Yol qazasında can bergenlerniñ adları belli oldı. Qırım yolunda omrav sebepleri bir aydan soñ aydınlatılacaqtır.

XS
SM
MD
LG