Link açıqlığı

Aqmescit mahkemesi «Qırım» Fondunıñ» mal-mülki ve bank esaplarınıñ tevqifini lâğu etmedi


Aqmescitniñ Merkeziy rayon mahkemesi «Qırım» Fondu» Hayriye Teşkilâtınıñ mal-mülki ve bank esaplarınıñ tevqifini öyle de qaldırdı. Bundan ğayrı, prokuraturanıñ qırımtatar halqınıñ lideri Mustafa Cemilevni fondnıñ tesisçileri erkânından çıqarmaq talabını yerine ketirdi.

Bunı fond yolbaşçısı Riza Şevkiyev Qırım.Aqiqat mühbirine bildirdi.

Hayriye teşkilâtnıñ malümatına köre, Ukraina halq deputatı fond tesisçileri erkânında yoq.

Şevkiyev uquqçılarnen aqıl tanışıp, fondnıñ appelâtsiya berecegini muracaat etecek.

Qırım.Aqiqat bergen malümatqa binaen, sentâbr 16-da, Qırımtatar Milliy Meclisiniñ binasında 12 saatlıq tintüv keçirildi. Neticede vesiqa, protokol, USB-fleş-taşıyıcıları, kassetler, İslâm edebiyatı ve bilgisayarlarnı alıp kettiler. Meclis vekilleri bunı basqı ve Qırımtatar Milliy Meclisini yoq etmek ıntıluvları olaraq tanıylar.

Bundan soñ sentâbr 17-de Meclis binasında «Qırım» Fondu» Hayriye Teşkilâtınıñ reisi Riza Şevkiyevge mahkeme qararını seslendirdiler. Bundan soñ «Qırım» Fonduna» ait olğan binanı qapatmaq qararları aqqında bildirdiler. Bundan sebep Qırımtatar Milliy Meclisiniñ vekilleri binanı terk etmege mecbur ediler.

Sentâbr 19-da Qırımtatar Milliy Meclisiniñ temsilcileri binanı terk etip, onı müürlemege mecbur oldılar.

Mahkeme nezaretçileri Meclis, «Qırım» Fondu», «Avdet» gazetası, «Yıldız» mecmuası yerleşken Şmidta, 2 adresi boyunca binanı tevqif ettiler. Bundan ğayrı, közeticileriniñ vesiqalarında Meclis ofisleri, em de «Qırım» Fonduna» ait olğan biger obyektler yerleşken Jidkova, 40 adresi boyunca bina da qayd etile.

İşğal etilgen Qırım «akimiyeti» Aqmescitniñ merkeziy rayon mahkemesi yanına avtozaklar ve OMONnı yolladı.

XS
SM
MD
LG