İşğal etilgen Qırım «akimiyeti» Aqmescitniñ merkeziy rayon mahkemesi yanına avtozaklar ve OMONnı yolladı.
Bunı Qırım jurnalisti Şevket Namatullayev Facebook saifesinde bildire.
«Aqmescitniñ Merkeziy rayon mahkemesinde «Qırım» Fondu» boyunca iş baqıla – Qırım prokuraturası Ukraina halq deputatı ve Meclisniñ sabıq reisi Mustafa Cemilevni tesisçiler erkânından çıqarmağa talap ete. Mahkeme binasınıñ yanına avtozaklar ve OMONnı alıp keldiler, ne olacaq aceba?», – yazdı jurnalist.
Qırım.Aqiqat bergen malümatqa binaen, sentâbr 16-da, Qırımtatar Milliy Meclisiniñ binasında 12 saatlıq tintüv keçirildi. Neticede vesiqa, protokol, USB-fleş-taşıyıcıları, kassetler, İslâm edebiyatı ve bilgisayarlarnı alıp kettiler. Meclis vekilleri bunı basqı ve Qırımtatar Milliy Meclisini yoq etmek ıntıluvları olaraq tanıylar.
Bundan soñ sentâbr 17-de Meclis binasında «Qırım» Fondu» Hayriye Teşkilâtınıñ reisi Riza Şevkiyevge mahkeme qararını seslendirdiler. Bundan soñ «Qırım» Fonduna» ait olğan binanı qapatmaq qararları aqqında bildirdiler. Bundan sebep Qırımtatar Milliy Meclisiniñ vekilleri binanı terk etmege mecbur ediler.
Sentâbr 19-da Qırımtatar Milliy Meclisiniñ temsilcileri binanı terk etip, onı müürlemege mecbur oldılar.
Mahkeme nezaretçileri Meclis, «Qırım» Fondu», «Avdet» gazetası, «Yıldız» mecmuası yerleşken Şmidta, 2 adresi boyunca binanı tevqif ettiler. Bundan ğayrı, közeticileriniñ vesiqalarında Meclis ofisleri, em de «Qırım» Fonduna» ait olğan biger obyektler yerleşken Jidkova, 40 adresi boyunca bina da qayd etile.
