Qırımtatar halqınıñ lideri Mustafa Cemilev onıñ oğlu Hayser Cemilev Qırım SİZOsından Krasnodar ülkesine avuştırılğanı aqqında haber etti.
Bunı 24 telekanalı bildire.
«Şimdi onı Rusiyege, Krasnodar ülkesine, alıp kettiler. Maña daa ziyade zarar ketirmek içün. Çünki onıñnen bağ yoq, ve adliyecilerni de kirsetmeyler. Olar özleri oña adliyecilerni belgileycek ekenler», – dedi Cemilev.
Lâkin, onıñ aytqanına köre, İnsan aqları boyunca Avropa mahkemesi ve Ukraina taqiqat organlarınıñ Hayser Cemilevni azat etüv qararları bar eken.
Hayser Cemilevni 2013 senesi mayıs 27-de Bağçasaraydaki evniñ azbarında yaqaladılar. O, 44 yaşında Fevzi Edemovğa qarşı ateş açıp, onı öldürdi.
Militsiya Cinayi kodeksiniñ 115-inci maddesi 1 qısmı (aselet öldürüv) boyunca cinaiy iş açtı. Mecliste bunı muqaytsızlıq sebebinden öldürüv dep adlaylar. Aqmescitniñ Kiyev rayon mahkemesi Hayser Cemilevni apske almağa qarar berdi.
Qırım işğalinden soñ taqiqat organları onıñ işini ğayrıdan ögrenmege istediler. Bu arada Kiyevniñ Apellâtsion mahkemesi Hayserniñ areketlerini muqaytsızlıqtan öldürüv olaraq tanıp, onı azat etüv aqqında qarar aldı. İnsan aqları boyunca Avropa mahkemesi Cemilevniñ oğlunı azat etmege çağırdı. Lâkin Rusiye buña qulaq asmay.
Qırımtatar halqınıñ lideri Mustafa Cemilevge Rusiye prezidenti Vladimir Putin ile körüşmege teklif etken ediler. Olarnıñ vadelerinden añlaşıla ki, subet neticelerine köre, Qırımda apste bulunğan Cemilevniñ oğlu azat etilecek, Cemilevniñ özüne ise Qırımğa kirmege ruhset berecekler.
Cemilevniñ fikirince, olarğa kerek olğan cevap almaq içün, onıñ oğlunı esir tutalar. Qırımtatar halqınıñ lideri emin ki, Qırım işğali beş yıldan ziyade sürmez, ve o, Vatanına keri qaytıp olur.
