Qırımtatar Milliy Meclisi nevbetteki Qurultay keçirilmesiniñ yerlerini baqa.
Bu aqqında sentâbr 27-de keçirilgen Meclis toplaşuvında subetleştiler.
QHA yazğanına köre, qırımtatar halqı Qurultayı bu seneniñ soñuna qadar Türkiyede ötkerile bile, dep ayttı Meclis Kâtibiyetiniñ reisi Dilâver Akiyev.
«Böyle variantlar – Qırım, Kiyev, Türkiye – İstanbul», – dedi Akiyev.
Hatırlatamız, qırımtatar halqınıñ lideri Mustafa Cemilev «Qırım birliginiñ» qırımtatar halqı Qurultayınıñ kendi saylavlarını keçirmek niyetini «FSB strategiyasınıñ qoqlalar meclisini meydanğa ketirmek areketi», dep adladı.
Qırım.Aqiqat az evel bergen malümatqa köre, yaznıñ başında meydanğa ketirilgen «Qırım Birligi» teşkilâtı zor vaqıtlarını yaşay. «Akimiyetke» muhalifet olğan Qırımtatar Milliy Meclisiniñ alternativ teşkilâtı olaraq meydanğa ketirilgen işbu strukturadan belli adamlar çıqıp başladı. Olardan biri cumhuriyet baş naziriniñ sabıq muavini Aziz Abdullayev de oldı. «Qırım Birligi» reisi Seytumer Nimetullayev teşkilâttaki vaziyet aynı qalğanını ayta.
