Qırımlılar Ukraina yardımına muhtaclar, lâkin bu yardım yalıñız qısmen degil de, bir sıra areketler kompleksinen yapılmalı. Bunı Qırımtatar Milliy Meclis reisiniñ muavini Ahtem Çiygoz UNİAN neşirine bildirdi.
Onıñ aytqanına köre, Qırım qırımtatarlarnıñ iştiragi ile bir sıra muzakerelerni keçirmeli.
Onıñ zanınca, qırımlılarnen bağlı qanunlarnı olarnıñ fikirlerini köz ögüne alıp, qabul etmeli.
«Olğan hatalar olmasın dep. Meselâ, Qırımdaki serbest iqtisadiy zona aqqında soñki qanun iş adamlarınıñ hocalıq faaliyeti ceetinden bir sıra sualler doğura. Ya da daa bir mesele, Rusiye pasportlarını almağa mecbur olğan qırımlılar qıtağa çıqar eken, anda añlaşılmağan vaziyetlerge oğraylar. Mence, Qırım yalıñız ayrı-ayrı meselelerniñ al etilmesine muhtac degil, bugün mında yaşağanlarğa bir sıra yardımlar kompleksi kerek», – dep qayd etti Meclis reisiniñ muavini.
Rusiyeniñ işğal etilgen Qırımnı keri qaytarmaqnıñ nasıl sebebi olması mümkün degen sualge, Ahtem Çiygoz diplomatik, iqtisadiy ve añlaşma usulları faydalı olacağını ayttı.
«Qırımda bir çoq millet yaşay, lâkin bizim regionımıznı Ukraina Şarqı ile qıyaslamaq mümkün degil. Evelden farqlı siyasiy küçler milletlerara meseleni ne qadar qullanmağa isteseler de, yerli sakinler er daim barışıqta yaşap, onıñ qıymetini bilip başladılar», – dep qayd etti Ahtem Çiygoz.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
