Sentâbr 25-ten itibaren Donetsk-Qırım yolcu trenleriniñ işi ğayrıdan tiklenile.
Bunı Donetsk demir yolunıñ matbuat hızmeti bildire.
Onıñ malümatına köre, Donetsk demir yolunıñ Donetsk-Aqyar № 47/48 «Gornâk» yolcu treni Kiyev vaqıtına köre saat 17:34 yolğa çıqa ve saat 7:05 Aqyarğa kelip çıqa. Aqyardan yerli vaqıtına köre saat 21:50 çıqa, saat 14:15 – Donetskte. Tren er kün yüre.
Tren yolu Volnovaha, Kamış-Zarâ, Melitopol, Canköy ve Aqmescit stantsiyalarını qaplap ala.
Yolcular Donetsk şeeri civarındaki Rutçenkovo ve Mandrıkino stantsiyalarında trenge mine bileler.
Malüm olğanı kibi, avgust 12-den berli arbiy areketler ve demir yolunıñ bozulması sebebinden Donetsk stantsiyasından trenler yürmey edi.
