Link açıqlığı

Berlinde Rusiye-Ukraina-Avropa Birliginiñ gaz boyunca daa bir körüşüvi keçirile


Berlinde Rusiye, Ukraina ve Avropa Birligi vekilleriniñ gaz boyunca körüşüvi

Cuma künü, sentâbr 26-da, Berlinde Rusiye, Ukraina ve Avropa Birligi vekilleriniñ gaz boyunca nevbetteki körüşüvi ötkerilecek, dep haber ete Azatlıq Radiosı.

Bundan evel Rusiye energetik naziri Aleksandr Novak Moskva öz fikirini deñiştirmedi, dep qayd etken edi. Demek ki, noyabr-dekabr borcları bütünley ve mayıs ve aprel borcları qısmen ödenilmek kerek. Al-azırda Ukrainanıñ «Gazpromğa» borcu beş milliard dollardan ziyadedir.

Ukraina baş naziri Arseniy Yatsenük Kiyev Rusiye ile yalıñız bazar şartları esasında añlaşmağa azır olğanını bildirdi.

«Bazar fiyatını alsaq, oña köre ödeycekmiz, lâkin Rusiyeniñ «Gazpromına» maddiy yardım köstermeycekmiz», – dep qayd etti Ukraina baş naziri.

Bu arada onıñ bildirgenine köre, qış yaqınlaşqanınen Rusiye qollarında daa ziyade imkânlar peyda ola. İyül ayınıñ soñunda Ukraina energetika ve kömür sanayı naziri Yuriy Prodan bildirdi ki, qızdıruv mevsimini keregi kibi qarşılamaq içün Ukrainanıñ gaz yedekleri yeterlidir.

Macaristanda memleket içinde gaz ihtiyacları arta, onıñ içün Ukrainağa gaz berilmesi belgisiz müddetke qadar toqtatıldı, dep aytıla gaz nañliye sistemasınıñ operator beyanatında.

2013 senesi mart ayında Macaristan şirketi ukrain tarafı ile Ukraina bazarına yılda 6 milliard kubometr gaz berilmesi aqqında añlaşqan edi. Aynı vaqıtta taşımalar ticaret ve tehnikiy şaraitlerge köre yapılacağını birden qayd ettiler.

İyün 16-dan itibaren «Gazprom» «Naftogazğa» gaz bermey. İyün ayından berli Ukraina Avropa memleketlerinden gaznı revers olaraq ala. Lâkin «Gazprom» yolbaşçısı Aleksey Miller Avropa memleketleri Ukrainağa gaz berecek olsalar, şirket Avropa şirketlerine gaz berilmesini eksilte bile, dep ayttı.

Avropa Birliginiñ energetika komissiyasınıñ yolbaşçısı Günter Ettinger Kiyev ve Moskvağa Ukraina ve Rusiye arasında gaz davası boyunca Stokgolm arbitraj mahkemesiniñ qararı olmağanına qadar çalışacaq gaz añlaşmasını imzalamağa teklif etti.

XS
SM
MD
LG