Kiyevde Rusiye elçihanesi yanında qırımtatarlarğa destek numayışı keçirildi.
Qırım.Aqiqat mühbiri bergen malümatına köre, tahminen elli insan toplanıldı: «ATR-den qollarıñıznı alıñız», «Reşat Ametov Rusiye işğalcileriniñ ellerinden öldi», «#StopCrimeanTatarsGenocide» yazıları ile plakatlarnı ketirdiler.
Bundan da ğayrı, faaliyetçiler «A4» kâğıtlarda qırımtatarlarnıñ taqibi aqqında malümatnı yazıp, olarnı Rusiye elçihanesi kirişiniñ yanında qaldırdılar.
«Qırımtatar ve ukrainlilerge qarşı işğalci akimiyetiniñ areketleri boyunca açuvımıznı bildirmege keldik. İşğal ile razı olmağan Qırım sakinlerine er kün basım eteler», – haber etti Qırım.Aqiqat saytına numayışnıñ teşkilâtçılarından biri, Tetâna Bezruk.
İnsanlarğa elçihaneden kimse çıqmadı, bina tamir işleri içün qapalı, hadimler müessisede bulunmay.
Sentâbr 17 künü «Qırım» Fondı»nıñ başı Riza Şevkiyevge Fondnıñ binasında bulunğan bütün qırımtatar teşkilâtları binanı terk etmege mecbur olğanı aqqında qararnı oqudılar.
Bundan evel, sentâbr 16 künü, Meclis binasında tintüvler keçirildi. Olarnıñ neticesinde qırımtatar milliy Meclis toplaşuvlarınıñ protokolları, bilgisayarlar ve Ukraina halq deptutatı Mustafa Cemilevniñ şahsiy şeyleri tutıp alındı.
Evel qayd etilgeni kibi, mahkemeciler Şmidta, 2 ve Jidkov, 40 adresi boyunca yerleşken binalarnı em de «Yıldız» mecmuasınıñ muarririyeti yerleşken ofisni qapatmağa qararını çıqardılar. Bu binalarnıñ içinde qırımtatar milliy Meclis ofisleri, «Avdet» gazetasınıñ muarririyeti ve diger teşkilâtlar buluna.
Sentâbr 24 künü «ATR» qırımtatar telekanalını ekstremizmde qabaatladılar. Mütenasip mektüp telekanalnıñ yolbaşçılığına Ekstremizmge qarşılıq boyunca merkezinden keldi. Mında telekanal «milliy ve diniy mensüplik boyunca ola bilecek ayırımlar aqqında fikirni tarqata, cemaatçılıq arasında Rusiyege qarşı keyf olmasına sebep bere, qırımtatar cemaatçılığı içinde akimiyet ve onıñ areketlerine sayğısızlıqnı doğura, böyleliknen ekstremist faaliyetiniñ telükesi peyda ola» dep yazılğan edi.
