Qırım Hocalıq mahkemesi kira añlaşmanıñ lâğu etilmesi ve binadan Bağçasaray rayon Meclisiniñ çıqarıluvı aqqında qararnı aldı.
Bunı Bağçasaray şeer yolbaşçılığınıñ matbuat hızmeti bildire.
Şeer şurasınıñ beyanatında qayd etilgeni kibi, Puşkin soq., 1 adresi boyunca yerleşken ve «Paçaci kâşanesi» adlı yerli abide olaraq belli olğan binanıñ kirası aqqında mahkemeniñ qararı «REP JF BGS» kommunal şirketiniñ «Ocalar şurası» cemaat teşkilâtına olğan davası boyunca alındı.
«Cemaat teşkilâtı añlaşma mecburiyetlerini eda etmegeni, kira ödenilmesi ile şartlar bozulğanı, kirağa tutılğan mülkniñ sigortası ve binanıñ maqsatqa köre işletilmegeni sebebinden dava açıldı», – deyler şeer şurasında.
Mında şunı qayd eteler ki, mahkeme kommunal şirketiniñ talaplarını bütünley qabul etti. Mahkeme qararı mahkemeciler tarafından mecburiy sürette amelge keçirilecek.
Bağçasaray rayon Meclisiniñ reisi Ahtem Çiygoz Qırım.Aqiqatqa şunı bildirdi ki, ne «Ocalar şurası» cemaat teşkilâtı, ne regional Meclisiniñ azaları mahkeme toplaşuvı aqqında bir şey bilmey ediler.
«Bizge belli olmağan qararlar saçmalıq ile alına. Aynı zamanda bizni demokratiyanıñ tarafdarları olıp, insan aqlarını ürmet etmege çağıralar», – dep bildire öz açuvını Çiygoz.
Onıñ sözlerine köre, mahkemeniñ resmiy qararını ve bildirüvlerni o daa körmegen eken.
İç bir bildirüvler kelmegenini «Ocalar şurası» cemaat teşkilâtınıñ reisi Dilâra Seytveliyeva de tasdiqladı.
Bağçasaray rayon Meclisi bu meseleni muzakere etmek içün yaqında toplaşacaq ola.
Sentâbr 17 künü «Qırım» Fondı»nıñ başı Riza Şevkiyevge Fondnıñ binasında bulunğan bütün qırımtatar teşkilâtları binanı terk etmege mecbur olğanı aqqında qararnı oqudılar.
Bundan evel, sentâbr 16 künü, Meclis binasında tintüvler keçirildi. Olarnıñ neticesinde qırımtatar milliy Meclis toplaşuvlarınıñ protokolları, bilgisayarlar ve Ukraina halq deptutatı Mustafa Cemilevniñ şahsiy şeyleri tutıp alındı.
Meclis azaları bunı «içtimaiy ceetten faal olğan insanlarnıñ qorquzuvı» olaraq tanıylar.
