Qırımnıñ öz başına tayin etilgen baş naziri Sergey Aksönov oktâbr 9 künü Qırım «parlament» toplaşuvında vazifelerine tam olaraq tayinlenecek, dep tüşüne Qırım «Devlet şurası» reisi Vladimir Konstantinov.
Bunı o sentâbr 25 künü Qırım «Nazirler şurası» toplaşuvında bildirdi, dep haber ete Qırım.Aqiqat mühbiri.
«Oktâbr 9 künü – tarihiy vaqia olacaq: Cumhuriyet başı saylanılacaq. Aksönov Sergey Valeryeviç tayinlenecek»
«Spiker» şunı qayd etti ki, bu sebepten iç bir şübe olmamalı, çünki «Yedinaya Rossiya» firqası regionda birincilikni qazandı.
Aksönov 2014 senesi fevralniñ soñundan «Nazirler şurası»nıñ başlığında tura. Sentâbr 14 künü Qırımda Rusiye qanunlarına köre «saylavlar» keçirildi, neticede akimiyetniñ bütün organları teşkil etilmek kerek edi.
Rusiye Prezidenti Vladimir Putin sentâbr 17 künü Qırım «Devlet şurasına» cumhuriyet başı vazifesine üç namzetni kösterdi: Sergey Aksönov, Qırım ekologiya ve tabiat resursları «naziri» Gennadiy Narayev ve RF Devlet Duma deputatı Aleksandr Terentyev.
Qırımda keçirilgen «saylavlarnı» Ukraina, AQŞ, Avropa birligi, NATO tanımaylar.
