Aqmescit şeeriniñ Kiyev rayon mahkemesi GTRK «Krım»da qırımtatar leyhalarnıñ icadiy birliginiñ müdiri Seitislâm Kişveyevniñ davasını qabul etti ve onı ğayrıdan vazifelerine tayinledi.
Bunı QHA agentligine Seitislâm Kişveyev bildirdi, – dep haber ete sentâbr 23 künü qırım neşiri.
Mahkemede Kişveyevniñ talaplarınıñ bir qısmını qabul etmege qarar berdi. Şu cümleden, mahkeme 2014 senesi iyün 25 künü GTRK «Krım» yolbaşçılığınıñ Kişveyevni işten boşatmaq qararını qanunsız tanımaq ve onı lâğu etmege avale çıqardı.
Onı 2014 senesi iyün 25-den GTRK «Krım» qırımtatar leyhalarnıñ icadiy birliginiñ müdiri vazifesine ğayrıdan tayinlemege qarar çıqarıldı.
Bundan da ğayrı, mahkeme GTRK «Krım»dan Kişveyevge 10 biñ ruble miqdarında tazminatnıñ ve işlemegen künleri içün aylıqnıñ ödenilmesini belgiledi.
İslâm Kişveyev QHA agentligine aytqanı kibi, bu qararğa baqmadan, o, GTRK «Krım»da vazifelerinden öz istegi ile çıqacaq eken.
«Arizanı yazdım. GTRK-da çalışmağa niyetim yoq, çünki, kerçekten aytsam, halqıma hızmet etmege ister edim, amma memurlarğa boysunmacam. Eñ esası – işten boşatılğanım adaletsiz olğanını tasdiqladım, amma anda işlemecem. Vaqıt deñişe, belki qaytırım, amma şimdi degil», – dedi Kişveyev
O, işbu dava boyunca üç mahkeme toplaşuvı olğanını bildirdi, soñkisi sentâbr 15 künü keçirildi.
Seitislâm Kişveyev kelecekke olğan planları ile paylaştı: «Bağçasarayda balalar ile çalışmağa niyet etem, bilgenimni balalarğa ögretecem. Mediatasil ile bağlı tögereklerni açarım, belki. Bağçasaray mektebinde tögerekni açıp, balalarnı ögretmege isteyim».
Seitislâm Kişveyevni GTRK «Krım» qırımtatar leyhalarnıñ icadiy birliginiñ müdiri vazifesinden iyün 25 künü boşattılar. Bunı Ukrainanıñ İş aqqında qanunlar kodeksiniñ 40-ncı madde, 3-nci qısımına (hadimniñ öz vazifelerini, maqbul sebepleri olmadan, becermegeni) esaslanıp yaptılar.
