Link açıqlığı

Rusiye çetel işler nazirliginde sentâbr 16 künü Aqmescitte «Qırım» Fondı» binasında tintüv keçirilmesiniñ sebebini añlattılar. Ve tintüv vaqtında silâ ve ekstremist edebiyat tapılğanını bildirdiler.

Bu aqta Rusiye çetel işler nazirliginiñ saytında aytıla.

«Qırım Cumhuriyetiniñ uquq qorçalayıcı organları Aqmescitniñ Merkeziy rayon mahkemesiniñ qararı ile Rusiye Federatsiyasınıñ qanunları boyunca qıdıruv tedbirlerni keçirdiler. Neticede bir qaç disk, ekstremist edebiyat, vesiqa ve silâ tutıp alındı», – denile beyanatta.

Mında şunı qayd eteler ki, tintüvniñ sebebi – işbu teşkilâtlar tarafından bir sıra qanun bozuluvları oldı, şu cümleden Mustafa Cemilevniñ Fondnıñ tesisçileri sırasında olması da bir sebep edi.

«Qırım Cumhuriyeti, Aqmescit ş., Jidkov soq., 40 adresi boyunca yerleşken «Qırım» Fondı» hayriye teşkilâtı 08.08.2001 s. № 129-FZ «Yuridik şahıslarnıñ ve şahsiy şirketlerniñ devlet qayd etüvi aqqında» Rusiye Federatsiyası Qanunıñ 5-nci maddesi 1-nci qısmınıñ noqtasında qayd etilgen talaplarnı bozıp, 2014 senesi mart 21-den öz faaliyetini Qırım Cumhuriyeti, Aqmescit ş., Şmidta soq., ev 2 adresi boyunca alıp bara», – qayd eteler mında.

«Qavmiy teşkilâtlarnıñ faaliyetlerini ürmet etip, Rusiye qanunlarına riayet etilmesini talap etem. Rusiye Federatsiyasında qanunlar er kes içün birdir, istisnalar yoq», – deyler nazirlikte.

Sentâbr 17 künü «Qırım» Fondı»nıñ başı Riza Şevkiyevge Fondnıñ binasında bulunğan bütün qırımtatar teşkilâtları binanı terk etmege mecbur olğanı aqqında qararnı oqudılar.

Bundan evel, sentâbr 16 künü, Meclis binasında tintüvler keçirildi. Olarnıñ neticesinde qırımtatar milliy Meclis toplaşuvlarınıñ protokolları, bilgisayarlar ve Ukraina halq deptutatı Mustafa Cemilevniñ şahsiy şeyleri tutıp alındı.

Evel qayd etilgeni kibi, mahkemeciler Şmidta, 2 ve Jidkov, 40 adresi boyunca yerleşken binalarnı em de «Yıldız» mecmuasınıñ muarririyeti yerleşken ofisni qapatmağa qararını çıqardılar. Bu binalarnıñ içinde qırımtatar milliy Meclis ofisleri, «Avdet» gazetasınıñ muarririyeti ve diger teşkilâtlar buluna.

XS
SM
MD
LG