«ATR» qırımtatar telekanalını ekstremizmde qabaatlaylar. Mütenasip mektüp telekanalnıñ yolbaşçılığına Ekstremizmge qarşılıq boyunca merkezinden keldi.
Bunı öz Facebook saifesinde «ATR» telekanalınıñ mühbiri Şevket Namatullayev bildirdi.
Jurnalist mektüpten bir qısmını aşkâr ete. Mında telekanal «milliy ve diniy mensüplik boyunca ola bilecek ayırımlar aqqında fikirni tarqata, cemaatçılıq arasında Rusiyege qarşı keyf olmasına sebep bere, qırımtatar cemaatçılığı içinde akimiyet ve onıñ areketlerine sayğısızlıqnı doğura, böyleliknen ekstremist faaliyetiniñ telükesi peyda ola» dep yazıla.
Namatullayevniñ malümatına köre, telekanal yolbaşçılığından vesiqalarnı ve kanalda işlegen bütün insanlarnıñ cedvelini talap ettiler.
Evel qırımtatarlarnıñ milliy lideri Mustafa Cemilev ATR telekanalı öz efirinde onıñ ile intervyüni köstergeni sebebinde onı qapatmağa vade etkenlerini bildirgen edi.
Qırımtatarlarnıñ taqibi işğal etilgen Qırımda adiy bir al oldı. Ev, medrese, camilerde tintüvler keçirile.
Qırımtatar halqına etilgen basım New-Yorkta keçirilgen BTM tamır halklarnıñ meseleleri boyunca konferentsiyada da muzakere etildi. Mında qırımtatarlarnıñ milliy lideri Mustafa Cemilev ve Meclis reisi Refat Çubarov da iştirak ettiler.
