Qırımda gece olğan ava felâketi neticesinde yarımadada bozuluvlar ve fevqulâde vaziyetler yüz berdi.
Qırımnıñ öz başına tayin etilgen akimiyetiniñ ruporı Krıminform saytınıñ malümatına köre, Saq rayonında ava vaziyeti sebebinden Trudovoye köyündе şahsiy evlerniñ batqanı qayd etildi. Mında tahminen 15 ev suvğa battı, suv seviyesi 30-50 sm köterildi.
Aqmescit rayonınıñ Nikolayevka qasabasında furtuna sailni terenge yuvğanı sebebinden, «Rassvet» istiraat evi zarar kördi. Dalğalar ile plâjnı teşkil etken çamur uçurımı, açıq terrasanıñ ve istiraat eviniñ baş binasınıñ temelleri terenge yuvuldı. Neticede terrasanıñ bir qısmı bozuldı.
Salı künü saat 23:00 Nikolayevkada evlerniñ bir qısmı yarıq ve suvsız qaldı.
Aqyarda, yerli matbuat hızmetlerniñ malümatına köre, gece ava felâketi neticesinde soqaqlar battı, maşinalar bozuldı, terekler qırıldı, teller qoparıldı.
Keriçte Pavlik Morozov soqağı boyunca yerleşken çoq qatlı evniñ damı qoptı, dep haber ete Kerç FM. Neşirniñ malümatına köre, ruzgârnıñ neticesinde şeerde terekler tüşürüldi, demir ve plastik inşaatlar bozuldı. Arşintsevoda ise 38 yaşında olğan qadınğa büyük pıtaq tüşti, qadınıñ qafası yaralandı.
Sentâbr 24-ne keçer gecesi furtuna sebebinden Keriç parom keçiti öz işini toqtattı. Bundan da ğayrı, ava vaziyeti sebebinden Qırım rayonlarında 203 mesken yeri yarıqsız qaldı.
