Rusiye tamır hаlqınıñ sekiz vekili ve qırımtatar halqını temsil etecek olğan qırımlı Nadir Bekirov New-Yorkta keçirilgen «Tamır halqlarnıñ işleri boyunca bütün dünya konferentsiyası»nda iştirak etip olamadılar.
Bunı Qırım tamır halqlarnıñ destegi ve taqiqat fondınıñ müdiri Nadir Bekirov Aqmescitte keçirilgen matbuat konferentsiyası devamında bildirdi, dep haber ete Qırım.Aqiqat mühbiri.
«İşbu sekiz insan ile bağlı vaziyet añlayışlı, mında ya FSB, ya da diger rusiyeli küçlerniñ iştiragi bar», – dey Bekirov. Amma onıñ işinen er şey bu qadar añlayışlı degil eken.
Bekirov şunı qayd etti ki, onıñ teşkilâtı ne Ukraina, ne Rusiye tarafdarı degil, o Qırım tamır halqlarınıñ aqlarını qorçalay.
«Qırımtatarlarnıñ ayırımını meydanğa ketirgen Ukraina devletine qarşı bayağı tenqidiy çıqışlarım bar edi. Menimce, şimdi Rusiye tarafından qırımtatarlarnıñ sıqıştıruvı yüz bere. Em de pek küçlü oldı».
Qırım tamır halqlarnıñ destegi ve taqiqat fondınıñ müdiri şunı qayd etti ki, «prezident Putinniñ üç devlet tilniñ teñ uquqlılığı aqqında aytqanları» amelde körünmey eken.
Ücüm kimniñ tarafından yapılğanını Bekirov aytıp olamay. Onıñ fikrince, bu ya Ukraina,ya Rusiye devletiniñ işidir. Ukrainanıñ sebebi – bugünki akimiyetniñ BMT toplaşuvında qırımtatarlarnı yalıñız Mustafa Cemilev ve Refat Çubarovnıñ sımalarında teslim etmege istegi ola bile eken. Faqat, ukraina temsilcileriniñ bunı amelge keçirmege imkânları barmı, Bekirov aytıp olamadı.
Sentâbr 18 künü, saat 17:00, Aqmescit-Canköy yolu etrafındaki Alabaş Qoñrat köyü yanında belgisiz şahıslar Qırım tamır halqlarınıñ destegi ve taqiqat fondınıñ müdiri Nadir Bekirovğa ücüm ettiler.
Bekirovnıñ añlatqanına köre, o Kiyevge New-Yorkqa yol almaq içün ketken edi. Anda sentâbr 22-23 künleri BMT Baş Assambleyasınıñ «Tamır halqlarnıñ meseleleri boyunca bütün dünya konferentsiyası» serlevalı mahsus toplaşuvı olmaq kerek edi.
Onıñ malümatına köre, avtobustan balaklavanı kiygen 4 insan çıqtı, taksi aydavcısını türtip çıqardılar, Bekirovnı ise topraqqa yatqızdılar, iç cebinden pasport ve telefonını alıp, aylanıp kettiler
