Estoniya Prezidenti Toomas Hendrik İlves sentâbr 22 künü tamır halqlarnıñ meseleleri boyunca Birinci Umumdünya konferentsiyasında qırımtatarlarğa qol tutqan Ukrainağa teşekkürlerini bildirdi.
Bunı qırımtatar milliy Meclis reisi Refat Çubarov Facebook saifesinde bildirdi.
«Estoniya Prezidenti Toomas Hendrik İlves Birinci Umumdünya konferentsiyasında (New-York, BMT Baş assambleyasınıñ toplaşuv salonı) öz çıqışında qırımtatarlarnı tamır halq olaraq tanığan Ukrainağa teşekkürlerini bildirdi», – dedi Refat Çubarov.
Belli olğanı kibi, New-Yorkta sentâbr 22-23 künleri Tamır halqlarnıñ meselleri boyunca Umumdünya konferentsiyası keçirile. Mında qırımtatarlarnıñ yetekçisi Mustafa Cemilev ve qırımtatar milliy Meclisiniñ reisi Refat Çubarov iştirak eteler.
Rusiye konferentsiya işinde qırımtatar milliy Meclisiniñ iştiragi sebebinden öz narazılığını bildirdi. Qırımda bulunğan ve andan konferentsiyağa yol almağa planlaştırğan qırımtatarlardan pasportlarını tutıp aldılar.
