Qırımnıñ öz başına tayin etilgen baş nazirge cevap olaraq Qırımda qırımtatarlarnıñ vaziyeti aqqında acele halqara konferentsiyasınıñ keçirilmesi ola bile.
Bunı Qırım.Aqiqat saytına qırımtatar milliy Meclisiniñ tış alâqaları boyunca yolbaşçısı Ali Hamzin bildire.
«Qırım» Fondı»na nisbeten çıqqan mahkemelerniñ sebebinden Meclis qapatılğan vaqıtta liderlerimiz Mustafa Cemilev ve Refat Çubarov Qırımda «Qırımnıñ Rusiyege qoşuluvı»ndan soñ qırımtatarlarnıñ vaziyeti boyunca konferentsiyanı teşkil etmek teklifi ile halqara toplulığına muracaat etse ediler, güzel olur edi. Yarımadada qırımtatarlarğa qarşı etilgen areket, mevam ve bildirüvlerge eñ eyi cevap olur edi», – dedi Meclis azası.
«Mart 18 künü Rusiye Prezidenti Vladimir Putinniñ halqımızğa yardım etmek mecburiyetleri aqqında bildirüvine baqmadan, Aksönovlarnıñ areketleri qırımtatarlarnı Qırımnı terk etmege mecbur etecektir… Böyleliknen, Rusiyeniñ Qırım territoriyasında birinci duşmanı qırımtatar halqı olğanını köremiz», – dey Hamzin.
«Bugün biz qırımtatarlarnıñ vaziyeti boyunca halqara konferentsiyanı çağıra bilemiz. Aks alda ciddiy aqibetler ola bile. Çünki bizim halqımız umumdünya buhrannıñ merkezindedir. Ve oña havfsızlıqnı kimse kefil etemez», – dedi Hamzin.
Evel Qırımnıñ öz başına tayin etilgen baş naziri Sergey Aksönov «Kоmmersant» gazetasına şunı bildirdi ki, Qırımnıñ Rusiyege qoşulması, memleket yolbaşçısınıñ tanılmaması ile bağlı areketler qanun boyunca taqip etilecek ve ğayet ciddiy mevam kösterilecek eken.
«İnsanlar arasında milletlerara zeminde ziddiyetlerni doğuracaqlarnı, nasıldır bir çare tаpıp, Qırımdan quvarım ve olar cezalarını cinaiy tertipte körerler», – dedi Aksönov.
Qırımtatar halqınıñ taqibi işğal etilgen Qırımda adiy bir şey oldı. Rusiye mahsus hızmetleri tarafından ev, mektep, medrese ve camilerde tintüvler keçirile.
Qırımtatar yetekçileri bunı qırımtatarlarnıñ yarımada Rusiye akimiyeti tanımağanı ve sentâbr 14 künü keçirilgen «saylavlarnı» Meclis tarafından boykot etmege qararı ile bağlay.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
