Qırımnıñ Rusiyege qoşulması, memleket yolbaşçısınıñ tanılmaması ile bağlı areketler qanun boyunca taqip etilecek ve ğayet ciddiy mevam kösterilecek.
Bunı Qırımnıñ öz başına tayin etilgen baş nazir Sergey Aksönov «Kоmmersant» gazetasına Qırım akimiyetiniñ qırımtatar ealisi ile munasebetler nasıl olacaq degen sualge cevap olaraq bildirdi.
«İnsanlar arasında milletlerara zeminde ziddiyetlerni doğuracaqlarnı, nasıldır bir çare tаpıp, Qırımdan quvarım ve olar cezalarını cinaiy tertipte körerler», – dedi Aksönov.
O şunı da bildire ki, qırımtatar ealisi arasında mart 16 künü keçirilgen «referendumnı» tanımağan Mecliske qol tutqanlar çoq degil: «İtibarı pek büyük degil. İçtimaiy soravnı keçirgen olsa edik, Mecliske qırımtatarlarnıñ 15-20% qol tutqanını ögrenir edik».
Aksönov bunı Meclis tarafından qırımtatarlarnıñ abadanlaştıruvı ile bağlı programmanıñ amelge keçirilmegeni ile añlata. Şimdi ise, dey o, Qırım akimiyeti 10 yıl evelsi qurulğan mekânlarnı sürgün etilgenlerge bütün vesiqalar ile bermege azır. Faqat, narazılıq meydançıqları episi bir yoq etilecek, dedi o, ve andaki binalarnı «tarla aranları» olaraq adladı.
«Olarnen bağlı vaziyetni yekünlemek kerek. Ayırıla bilecek massivlerimiz bar, em de olarnı milliy menüsplikke baqmadan berecekmiz. Anda em qırımtatarlar, em ruslar olacaq. Qırımtatarlarğa mekânlar bir-biri yanında beilrmek kerekligi qanunda yazılmağan», – dedi Aksönov.
Qırımtatar halqınıñ taqibi işğal etilgen Qırımda adiy bir şey oldı. Rusiye mahsus hızmetleri tarafından ev, mektep, medrese ve camilerde tintüvler keçirile.
Qırımtatar yetekçileri bunı qırımtatarlarnıñ yarımada Rusiye akimiyeti tanımağanı ve sentâbr 14 künü keçirilgen «saylavlarnı» Meclis tarafından boykot etmege qararı ile bağlay.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
