Qırımtatar milliy Meclisi esabında olğan «Qırım» Fondı» hayriye teşkilâtınıñ işi boyunca mahkeme toplaşuvını sentâbrniñ 22-den 29-na keçirdiler.
Bunı Qırım.Aqiqat saytına «Qırım» Fondı» teşkilâtınıñ baş müdiri Riza Şevkiyev bildirdi.
«Prokuraturanıñ qararı saçmalıq olğanını isbatladıq, olarnıñ sözlerine köre, çetel vatandaşı olğan Mustafa Cemilevniñ Fondnıñ tesisçisileri sırasına kirmege aqqı yoqtır. Bu fikir yañlıştır»,– dey Şevkiyev.
Onıñ aytqanı kibi, Fondnıñ tesisçileri arasında 2002 senesinden üç insan bar, Cemilev olarnıñ sırasında degildir.
«Mustafa Cemilev yürek ve añlarımızda qala, kâğıtta onıñ adı olmağanı emiyetli degil, o, bizim yetekçimizdir. Amma yuridik olaraq tesisçimiz degil. Elimizde olğan bütün protokollarımıznı, tesisçilerimizniñ soyadlarını taqdim ettik, prokuraturada bu malümatnı Adliye nazirliginde teşkermege istegini qayd ettiler. Şunıñ içün prokuratura Adliye nazirliginde bu malümatnı teşkerip, mahkemege taqdim etecek, bu sebepten toplaşuvnı sentâbr 29 künü saat 10-da keçirecekler», – dep añlattı Fondnıñ başı.
Bunıñ ile o şunı bildirdi ki, Fondnıñ binası Aqmescitniñ merkezinde alâ daa qapalıdır ve içeri kirmege imkânsızdır.
«İşbu yasaq red etilmesi içün muracaatnı yollağan edik, amma mahkemeci bu qıyın bir ketişat olğanını qayd etti. Şimdi bunı adliyecimiz ögrene», – dedi Şevkiyev.
Fondnıñ esapları da alâ daa qapalıdır, onıñ yolbaşçısı ise olarnıñ açılacağına ümüt besley, çünki olarğa nasıldır bir ciddiy iddialar yoq eken.
«Mahkemeden kimse qaçmay da, men mektüplerni, bildirüvlerni alalmayım. Aselet bir tuzaqqa bizni quvalaylar, faqat bu kibi qararlarnı almağa iç bir acet yoq edi», – dep tüşüne Şevkiyev.
Sentâbr 17 künü «Qırım» Fondı»nıñ başı Riza Şevkiyevge Fondnıñ binasında bulunğan bütün qırımtatar teşkilâtları binanı terk etmege mecbur olğanı aqqında qararnı oqudılar.
Bundan evel, sentâbr 16 künü, Meclis binasında tintüvler keçirildi. Olarnıñ neticesinde qırımtatar milliy Meclis toplaşuvlarınıñ protokolları, bilgisayarlar ve Ukraina halq deptutatı Mustafa Cemilevniñ şahsiy şeyleri tutıp alındı.
Meclis azaları bunı «içtimaiy ceetten faal olğan insanlarnıñ qorquzuvı» olaraq tanıylar.
