Qırımnıñ öz başına tayin etilgen baş nazir Sergey Aksönov sentâbr 20 künü Soçide Şimaliy Оsetiya Cumhuriyeti – Alaniya, Çuvaş Cumhuriyeti, Sahalin vilâyeti, Qaraçay-Çerkess Cumhuriyeti, Krasnodar diyarı ile regionlarara işbirlik aqqında añlaşmanı imzaladı. Bunı «Nazirler şurası» matbuat hızmeti Facebook saifıyesinde bildirdi.
«Añlaşmalar adiydir. İşbirlik olacaq yönelişler iş taqımlarnıñ teşkil etilmesi ile amelge keçirilecek. Nazirlerimiz diger vilâyet ve regionlarda yaşağan zenaatdaşlarını ziyaret etip, tecribe ile paylaşacaqlar»,– dey Aksönov.
Onıñ sözlerine köre, Qırım al-azırda Rusiye Federatsiyasınıñ tahminen 80 subyekti ile işbirlik aqqında añlaşmalarnı imzaladı.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
