Link açıqlığı

İşğal etilgen Aqmescitte Meclis azaları binanı terk ettiler


Ukraine -- Mejlis of the Crimean Tatar people preparing to arrest building bailiffs of the Russian Federation

Cuma künü, sentâbr 19-da, mahkemeciler qırımtatar milliy Meclis binasını qapatmaq içün öyle de kelmediler, şunıñ içün «Qırım» Fondı» hayriye teşkilâtınıñ müdiri Riza Şevkiyev özü Aqmescitte yerleşken mahkemecilerniñ federal hızmeti idaresine barmağa mecbur edi.

Sentâbr 18 künü mahkemeciler «Qırım» Fondı» teşkilâtınıñ müdirini, hadimler vaqtında binanı terk etmegenleri sebebinden, 50 biñ rublege cezaladı. Bundan soñ Meclis hadimlerine müddetni daa bir künge uzattılar.

«Mahkemecilerniñ ofisi yerleşken adresi boyunca ketmege mecbur edim, bu obyekt ile oğraşqan insanlar ise iş yerinde degil ediller. Olar şeerniñ tışında ekenler», – dep tarif etti QHA agentligine Riza Şevkiyev.

«Qırım» Fondı» teşkilâtınıñ baş müdiri añlatqanı kibi, işbu vaqialarnıñ sebebinden o, Meclisniñ merkeziy ofisi yerleşken binanıñ qoruvını temin etmeli.

«Yapmaq kerekligimni bilmeyim, olarğa qapalı qapılarnı kösterip, soñ ne yapmaq kerekligimni soramağa istey edim. Bina devlet qoruvı altındadır ve mimarcılıq abidesi sayıla.Onı boş qaldıramam. Şimdi qapını açıp, binanı qaravullaycaq insannı anda qaldırmaq mecburım. Aynı bu areketlerimni olarnen muzakere etmege niyet ete edim. Amma olar razı olmadılar. Menim bu areketlerim qanuniy olacağını tüşünem, çünki ofis işlemeycek, onı yalıñız nezaret etecekler», – dedi o.

Meclis azası qayd etkeni kibi, şeylerni toplağandan soñra, olar Şmidta 2 soqağı boyunca yerleşken binanı özleri qapattılar.

«Binanı qapatmaq aqqında laf yoq edi. Menim şahsiy teşebbüsim edi. Yani başqa bir şeyge ilişmege sebepleri olmasın ve niayet cemiyetke fayda ketirmeycek şeylernen oğraşmasını bıraqsınlar dep yaptım», – dey o.

Qapalıcaq daa altı obyektni Riza Şevkiyev qırımtatar milliy Meclisiniñ ofisi olğan şaraitlerde köstermege azır edi.

Faqat, «Qırım» Fondı»nıñ baş müdiri sentâbr 22 künü keçirilecek toplaşuv er şeyni «eskisine» qaytaracağına ümüt besley.

«Yaqında mahkeme olacaq, er şey yerine qaytarılacaq dep tüşünem, çünki qapatılmaq kerek ofislerden birisi «Yıldız» mecmuasınıñ ofisidir, o ise Qırım bücetiniñ esabındadır. Mecmuanıñ işine keder etmek cumhuriyetiniñ menfaatında olmağanını tüşünem, ekinciden ise, insanlar yaşağan yerde…olarnı soqaqqa taşlamağa olmay», – dep yekün çekti Şevkiyev.

Evel qayd etilgeni kibi, mahkemeciler Şmidta, 2 ve Jidkov, 40 adresi boyunca yerleşken binalarnı em de «Yıldız» mecmuasınıñ muarririyeti yerleşken ofisni qapatmağa qararını çıqardılar. Bu binalarnıñ içinde qırımtatar milliy Meclis ofisleri, «Avdet» gazetasınıñ muarririyeti ve diger teşkilâtlar buluna.

XS
SM
MD
LG