Qırım «prokuraturası» mahkemege qırımtatar milliy Meclisi sabıq başı Mustafa Cemilevniñ «Qırım» Fondı» hayriye teşkilâtınıñ tesisçilerinden çıqarmağa talap etti.
Bunı Qırımnıñ öz başına tayin etilgen akimiyetiniñ ruporı Krıminform saytı bildire.
«Prokuratura»da eminler, fondnıñ yolbaşçılığında olıp, Cemilev Qırımda «içtimaiy ketişatlarğa tesir ete bile».
Mında «Qırım» Fondı» qırımtatar hayriye teşkilâtınıñ faaliyetine bir sıra bozuluvlarnı qayd etkenleri aqqında bildireler. Olardan birisi, deyler «prokuraturada», «Ticariy olmağan teşkilâtlar aqqında» Rusiye qanunıñ bozuluvıdır. Oña köre, bu kibi teşkilâtnıñ tesisçileri sırasına çetel vatandaşı ya da Rusiyege kirişi yasaq etilgen şahıs kiremez.
«Prokuratura»da qayd eteler ki, 2002 senesinden hayriye teşkilâtınıñ tesisçileri sırasına kirgen Mustafa Cemilev Ukraina vatandaşıdır. Mında şunı da aytalar ki, 2014 senesi aprel 19-da akimiyet onıñ Rusiye Federatsiyasınıñ territoriyasında bulunuvını beş yılğa yasaq etti.
«Qırım» Fondı» tesisçileriniñ sırasından Cemilevniñ çıqarıluvı aqqında mesele Aqmescit şeeriniñ Merkeziy rayon mahkemesinde sentâbr 22 künü baqılacaq.
Sentâbr 17 künü «Qırım» Fondı» baş müdiri, Meclis azası Riza Şevkiyevge Aqmescitniñ Merkeziy mahkemesiniñ qırımtatar teşkilâtlarınıñ Meclis binasını boşatmaq kerekligi aqqında qararını oqudılar.
Halqara teşkilâtlar ve uquq qorçalayıcılar işğal etilgen Qırımda insan aqlarınıñ bozuluvı ve qırımtatarlarğa nisebeten etilgen adaletsizlik sebebinden öz qasevetini bildirdiler.
