Türkiye çetel işler nazirligi qırım akimiyetniñ qırımtatarlarğa nisbeten etken arketelerini takbih etti ve qırımtatar ealiniñ qorquzuvını toqtatmağa çağırdı.
Bu aqta Türkiye çetel işler nazirliginiñ beyanatında aytıla.
«Qırımtatar halqına nisbeten etilgen sıqıştıruv sebebinden qasevet çekemiz. Qırımnıñ tamır halqı olğan qırımtatar milletiniñ qorquzuvını takbih etemiz ve bunı toqtatmağa çağıramız», – denile Çetel işler nazirliginiñ beyanatında.
Sentâbr 16-17 künleri Qırımda qırımtatarlarnıñ toplu yaşağan mesken yerlerde kütleviy tintüvler keçirile edi. Çarşenbe künü, Yağmurça qasabasınıñ camisinde, Aqmescit civarındaki Bulğanaq köyünde ve Zuya qasabasınıñ qırımtatar mektebinde tintüvler ötkerildi.
Yaqında, sentâbr 16 künü, qırımtatar milliy Meclis azası Eskender Bariyevniñ evinde tintüv keçirildi, neticede bilgisayarlarını tutıp aldılar. Daa bir tintüv Qarasuvbazar regional Meclisiniñ başı Mustafa Asabanıñ evinde keçti.
Bundan soñ Aqmescitte yerleşken qırımtatar milliy Meclis binasını silâlı insanlar sarıp aldı, içeri tintüvni keçirmege başladılar.
Sentâbr 17 künü «Qırım» Fondı» baş müdiri, Meclis azası Riza Şevkiyevge Aqmescitniñ Merkeziy mahkemesiniñ qırımtatar teşkilâtlarınıñ Meclis binasını boşatmaq kerekligi aqqında qararını oqudılar.
Halqara teşkilâtlar ve uquq qorçalayıcılar işğal etilgen Qırımda insan aqlarınıñ bozuluvı ve qırımtatarlarğa nisebeten etilgen adaletsizlik sebebinden öz qasevetini bildirdiler.
