Link açıqlığı

İslâm Terek rayoınıñ Seyit Eli köyünde sentâbr 19 künü yerli sakinler politsiya maşinalarını kördi. Köyde yaşağan qırım tatarları tintüvlerden qorqa.

Bunı Qırım.Aqiqat saytına qırımtatar milliy Qurultayınıñ Merkeziy Saylav komissiya reisi Zair Smedlâyev bildirdi.

«Üç politsiya maşinasını köydiler. Köyge ne maqsat ile kelgenlerini kimse bilmey. Bizni ep haberdar etmege rica ettim», – dedi Smedlâyev.

Sentâbr 16-17 künleri Qırımda qırımtatarlarnıñ toplu yaşağan mesken yerlerde kütleviy tintüvler keçirile edi. Çarşenbe künü, Yağmurça qasabasınıñ camisinde, Aqmescit civarındaki Bulğanaq köyünde ve Zuya qasabasınıñ qırımtatar mektebinde tintüvler ötkerildi.

Yaqında, sentâbr 16 künü, qırımtatar milliy Meclis azası Eskender Bariyevniñ evinde tintüv keçirildi, neticede bilgisayarlarını tutıp aldılar. Daa bir tintüv Qarasuvbazar regional Meclisiniñ başı Mustafa Asabanıñ evinde keçti.

Bundan soñ Aqmescitte yerleşken qırımtatar milliy Meclis binasını silâlı insanlar sarıp aldı, içeri tintüvni keçirmege başladılar.

Sentâbr 17 künü «Qırım» Fondı» baş müdiri, Meclis azası Riza Şevkiyevge Aqmescitniñ Merkeziy mahkemesiniñ qırımtatar teşkilâtlarınıñ Meclis binasını boşatmaq kerekligi aqqında qararını oqudılar.

Halqara teşkilâtlar ve uquq qorçalayıcılar işğal etilgen Qırımda insan aqlarınıñ bozuluvı ve qırımtatarlarğa nisebeten etilgen adaletsizlik sebebinden öz qasevetini bildirdiler.

XS
SM
MD
LG