Link açıqlığı

Qırımdan beş halq deputatı Radada öz vazifelerinden vazgeçmege istey


Qırımda 2012 senesi majoritar bölüklerinde Regionı Firqasından Ukraina Yuqarı Şurasına saylanğan beş deputat: Vitalina Dzoz, Оleg Paraskiv, Valentina Lütikova, Sergey Brayko ve Grigoriy Gruba Qırımda sentâbr 14 künü keçirilgen «saylavlardan» soñ Ukraina parlamentinde öz vazifelerinden vazgeçmege qarar aldılar.

Bunı deputatlar sentâbr 18 künü Aqmescitte keçirilgen matbuat konferentsiyası devamında bildirdiler, dep haber ete Qırım.Aqiqat mühbiri.

«Ukraina Yuqarı Şurasında bulunğanım keçerli degil, şunıñ içün bugün Ukraina Yükarı Şurası deputatınıñ vekâletlerinden vazgeçkenimni bildirem ve öz vekâletlerimni Qırımda saylanğan zenaatdaşlarıma teslim etem, olar bizim saylayıcılarımız ile işke devam etecekler»,– dedi Dzoz.

Oña Paraskiv qol tuttı ve Qırım ile Kiyev arasında fikirdeşlik köpürni qurıp olamağanını da qoşıp ayttı.

«Evelden arizalarnı imzalamağa aqqımız yoq edi, köpür olmalı edi – Ukraina ile Qırım arasından fikirdeşlik ıntıluvı olmaq kerek edi. Afsus ki, yapamadıq, bizni eşitmediler… Men de Yuqarı Şuranıñ deputat korpusı erkânında özümni körmeyim»,– dey Paraskiv.

Qırım «parlamenti»niñ yañı saylanğan deputatlarğa öz yardımını halq deputatı Lütikova da bildirdi.

«Men de Yuqarı Şuranıñ deputat korpusında vekâletlerimlen vazgeçem. Sentâbr 14 künü saylanğan akimiyet qanuniydir, saylavlar açıq edi. Yaş deputatlarğa yardım etmege azırmız»,– dep ayta Lütikova.

«Zenaatdaşlarımnıñ qararına qol tutam. Yuqarı Şurağa tekrar menden deputat vekâletlerni almağa rica etem, anda özümni, tabiiy ki, körmeyim,– dey Brayko. – Sentâbr 14 künü keçken saylavlar adiy, şübesiz, eñ adaletli ediler».

Qırım saylav komissiyası Cumhuriyetniñ Delvet Şurası deputat saylavlarınıñ neticelerini tasdiqladı: 70 mandat «Yedinaya Rossiya» ve 5 – LDPR firqasına berildi.

Ukraina, Avropa Birligi, AQŞ ve NATO Qırım saylavlarını tanımadı ve Ukraina Baş Prokuraturası qanunsız saylavlar boyunca cinaiy işni başladı.

XS
SM
MD
LG