Qırımda işğalci akimiyetke boysunğan Meclisni körmege isteyler, amma qırımtatarlarnıñ azimkârlığı sebebinden sıqıştıruvlar devam etecek, dedi milliy yetekçi Mustafa Cemilev, dep haber ete UNN.
«Olar (yañı akimiyet – muar.) işğalni tanığan ve hayırlağan qırımtatar milliy Meclisni körmege isteyler. Bizde böyle bir şey yoq edi ve olmaycaq, şunıñ içün bu kibi sıqıştıruv devam etecek», – dedi Cemilev.
O, rusiyeli akimiyet Qırımda «saylavlarnıñ yıqılğanı sebebinden açuvlanğanını» qayd etti.
«Qırımtatarlar basqı altındalar, tintüv, işten boşatuv, orduğa çağıruv, bunıñ ile insanlarnı özüne boysundırmağa tırışalar», – dey o.
O, qırımtatarlar Rusiye tarafından kösterilgen cezalavlarğa baqmadan, Meclisni qorumağa devam eteceklerine ümüt besley.
Sentâbr 17 künü «Qırım» Fondı»nıñ başı Riza Şevkiyevge Fondnıñ binasında bulunğan bütün qırımtatar teşkilâtları binanı terk etmege mecbur olğanı aqqında qararnı oqudılar.
Bundan evel, sentâbr 16 künü, Meclis binasında tintüvler keçirildi. Olarnıñ neticesinde qırımtatar milliy Meclis toplaşuvlarınıñ protokolları, bilgisayarlar ve Ukraina halq deptutatı Mustafa Cemilevniñ şahsiy şeyleri tutıp alındı.
