Qırımtatar halqınıñ yetekçisi Mustafa Cemilev «Qırım» Fondı» mülkiniñ zaptını «aydutlıq» olaraq tanıy. Bunı o QHA habеr agentligine bildirdi.
«Aydutlıqtır. Olar (mahkemeciler, – muar.) saçmalıqnı aytalar. Qararnı atta bizge belli olmağan bir mahkeme çıqardı eken. Ve işbu mahkeme qararını almağa kerek olğan fond bu qarar aqqında bile bir şey bilmey. Şimdi şu mahkeme aqqında bir şeyler ögrenmege tırışalar – mahkemeci ise çoqtan raatlıqtadır eken… Açıq-aydın aydutlıqtır», – dedi Cemilev.
Onıñ sözlerine köre, qırımtatar halqı yarımadada qorqu altında yaşay, şunıñ içün bu aydutlıqqa cevap bermek içün Mecliske bile yaqınlaşıp olamay. Çünki FSB er kesni fotoğa çeke, yarın olarnıñ evlerinde ise tintüvler keçirilecek ve ilâhre,– qayd ete Cemilev.
O, bu adiselerge munasebeti tınç olğanını bildirdi, çünki «episi bir er şey yerine qaytıp kelir».
«Elbette ki, dünya toplulığınıñ diqqatını buña çekecekmiz. AQŞ elçihanesi kendi qasevetini bildirdi, Türkiye elçihanesi seslenecek, prezident, baş nazirge mektüpler yollanıldı, qırımtatar diasporası er daim telefon açıp, ne yapmaq kerekligini soray» – tarif ete Cemilev.
Onıñ sözlerine köre, ukrain mahkemelerniñ cevabı da olacaq.
Sentâbr 17 künü «Qırım» Fondı»nıñ başı Riza Şevkiyevge Fondnıñ binasında bulunğan bütün qırımtatar teşkilâtları binanı terk etmege mecbur olğanı aqqında qararnı oqudılar.
Bundan evel, sentâbr 16 künü, Meclis binasında tintüvler keçirildi. Olarnıñ neticesinde qırımtatar milliy Meclis toplaşuvlarınıñ protokolları, bilgisayarlar ve Ukraina halq deptutatı Mustafa Cemilevniñ şahsiy şeyleri tutıp alındı.
