Link açıqlığı

Qırımtatar milliy Meclisi, «Qırım» Fondı» hayriye teşkilâtı, «Avdet» gazetası bir kün içinde Aqmescit merkezinde Şmidta soqağı boyunca yerleşken binanı terk etmeli.

Bu mahkeme qararnı sentâbr 17 künü «Qırım» Fondı» teşkilâtınıñ reisi Riza Şevkiyevge Qırım Cumhuriyeti boyunca mahkemecilerniñ federal hızmeti İdaresiniñ mahsus icraiy işlerniñ amelge keçirilüvi boyunca mahkemecilerniñ Rayonara bölüginiñ hadimi oqudı, dep haber ete Qırım.Aqiqat mühbiri.

Aks alda, binada qalğan mülkni yaqalap, içeri ise iç kimseni kirsetmecekler, deyler mahkeme hadimleri.

Şevkiyevge taqdim etilgen vesiqalarda aytılğanı kibi, bu qararğa sentâbr 15 künü Aqmescitniñ Merkeziy rayon mahkemesiniñ icraiy kâğıtı oldı eken.

Onıñ rezolütiv qısmında qayd etilgeni kibi, «Qırım» Fondı» teşkilâtına «Aqmescitte Jıdkov 40/Krılov soq, 117; 8 Marta soq, 34; Yaltinskaya soq, 155, kv. 3; Krımskih partizan, 23, kv. 44; Kiyevskaya soq, 92-a, kv. 34; Jelâbova soq, 37/8, kv. 88; Şmidta soq, 2 adresi boyunca yerleşken mülkniñ qullanuvında saip vekâletlerini becermege, binanı kirağa bermege, işbu mülk ile bağlı nasıldır añlaşmalarnı qabul etmege» yasaq etile.

Mahkemeniñ qararı amelge keçirilmegen olsa, Fondnıñ başı cinaiy mesülietke çekilecek.

Bunıñ ile, Qırım «prokurorı»nıñ qararı ile «Qırım» Fondı»nıñ «Vladikombank»ta olğan esapları qapatıldı. Yañı esaplarnı açmağa ise yasaqtır.

Qırım.Aqiqat neşiriniñ «Qırım» Fondı» binanı terk etecekmi degen ualine Şevkiyev cevap berip olamadı.

«Adliyeciler bu qarar üzerinde tüşüneler ve ileride yapılacaq areketler boyunca muzakerelerni keçirecekler. Binanı boşatmaq mümkün olmağan bir şeydir. Boşatmasaq, demek olarğa binamıznı işğal etmege izin berermiz»,– dedi o.

«Qırım» Fondı» ve Meclisniñ etrafında olayatqan adiselerni Riza Şevkiyev sentâbr 14 künü «Devlet şurası»na olğan saylavlarda vatandaşlarnıñ iştirak etmegeni ile bağlay.

«Şimdi qırımtatar halqını Qırım ealisiniñ amanlığına keder etken duşman olaraq kösterecekler ve bizni faal sürette sıqacaqlar. Böyleliknen, olardan yüz çevirgen saylayıcılarnıñ közlerinde öz şüretini kötermege çalışacaqlar», – dey Şevkiyev.

Sentâbr 17 künü Qırımtatar milliy Meclis binasına FSB ve mahkeme hadimleri keldiler. Olar «Qırım» Fondı» hayriye teşkilâtınıñ reisi Riza Şevkiyege mahkeme qararını oqudı ve mülkni müürlemege azırlanalar.

Sentâbrniñ 16-da Aqmescitte qırımtatar milliy Meclisiniñ binasını silâlı insanlar sarıp aldı, mında tintüv keçirildi.

Tintüv neticesinde qırımtatar milliy Meclis toplaşuvlarınıñ protokolları, bir qaç diniy kitap, bilgisayarlar ve Ukraina halq deputatı Mustafa Cemilevniñ şahsiy şeyleri tutıp alındı. Qırımnıñ içki işler nazirliginde ve Taqiqat komitetinde izaatlarnı bermekten vazgeçtiler.

Meclis vekilleri bunı «içtimaiy ceetten faal olğan insanlarnıñ qorquzuvı» olaraq tanıylar.

XS
SM
MD
LG