Link açıqlığı

Saatnıñ esas haberi

Qırım «ükümetinde» Meclisniñ tintüvinde Cemilev qabaatlı olğanını aytalar


Aqmescitniñ ofislerinden birisinde keçirilgen taqiqat areketleri qırımtatar milliy Meclisi ile iç te bağlı degil, bina Ukraina deputatı Mustafa Cemilevge aittir, dep ayta Qırımnıñ «baş nazir muavini» Ruslan Balbek, haber ete RİA Novosti.

«İşbu taqiqat areketleri Meclis binasında degil de, «Qırım» fondı esabında olğan binada keçirildi. Onıñ yekâne tesisçi ise Mustafa Cemilevdir, yani o, binanıñ saibi ola», – dey Balbek.

Onıñ sözlerine köre, taqiqat areketleri mayıs 3 künü Cemilevniñ tarafından teşkil etilgen Rusiye sıñırınıñ qanunsız keçüvi ile bağlıdır.

Agentlikniñ subetdeşi aytqanı kibi, mart ayından Meclis bu binada öz toplaşuvlarını keçirimey edi, çünki onıñ üzerine, Balbekniñ sözlerine köre, Cemilevniñ emri ile Ukraina bayrağı asıldı. Balbek şunı da qayd etti ki, bu bina qırımtatarlarnıñ içtimaiy ihtiyacları içün berilgen edi, amma Cemilev onı kendi mülki olaraq tanıdı, dep ayta Qırımnıñ öz başına tayin etilgen akimiyetiniñ vekili.

O şunı tüşüne ki, Cemilev bu binanı öz şahsiy mülki olaraq qayd etti eken.

Belli olğanı kibi, sentâbr 16 künü Aqmescitte qırımtatar milliy Meclis binasını silâlı insanlar sarıp aldı, mında tintüv keçirildi. Qırımnıñ İçki işler nazirligi ve Taqiqat komiteti izaatlarnı bermekten vazgeçtiler.

Tintüv neticesinde qırımtatar milliy Meclis toplaşuvlarınıñ protokolları, bir qaç diniy kitap, bilgisayarlar ve Ukraina halq deputatı Mustafa Cemilevniñ şahsiy şeyleri tutıp alındı.

Meclis vekilleri bunı «içtimaiy ceetten faal olğan insanlarnıñ qorquzuvı» olaraq tanıy.

XS
SM
MD
LG