Link açıqlığı

Sentâbr 17 künü Aqmescitniñ Yağmurça qasabasında prokuratura hadimleri teşkerüvni keçirgen camide Rusiyede, şimdi ise Qırımda da yasaq olğan islâm edebiyatnıñ cedvelinden kitaplarnı tutıp aldılar.

Qırım.Aqiqat mühbiriniñ aytqanına köre, camide «yasaq etilgen» edebiyat cedvelinden 3 kitapnı tutıp aldılar, daa 5 kitapnı teşkerecekler.

Yerli meclisniñ başı Şevket Bekirov jurnalistlerge şunı bildirdi ki, prokuratura hadimleri camide namazlarnıñ keçkenini ve anda insanlarnıñ ekstremizm ile oğraşmağanlarını teşkere edi.

Sentâbr 17 künü silâlı insanlar ile politsiya maşinaları Aqmescit civarında yerleşken Bulğanaq köyüne kelip, qırımtatarlarnıñ evlerini tintemege başladı. Кöy sakinleriniñ aytqanı kibi, mayıs 3 künü Ermeni Bazarda qırımtatarlar öz lideri Mustafa Cemilevni qarşılamağa çıqqanı ile bağlı cinaiy iş çerçivesinde tintüvni dört evde keçirdiler. Tintüvniñ sebeplerinden daa biri – bir qaç ay evelsi yüz bergen turmuş ziddiyetidir.

Qırımtatar milliy Meclis binasına FSB ve mahkeme hadimleri keldiler. Olar «Qırım» Fondı» hayriye teşkilâtınıñ reisi Riza Şevkiyege mahkeme qararını oqudı ve mülkni müürlemege azırlanalar.

Qırım.Aqiqat bergen malümatına köre, saba sentâbr 16 künü qırımtatar milliy Meclis azası Eskender Bariyevniñ evinde de tintüv keçirildi, neticede onıñ bilgisayarı tutıp alındı.

Bundan soñ qırımtatar milliy Meclis binasını da sarıp aldılar, anda tintüvler keçirildi.

Qarasuvbazar regional Meclisiniñ reisi Mustafa Asabanıñ evinde de tintüvler keçirildi, bundan soñ onı sorğuğa alıp kettiler.

Qırımnıñ içki işler nazirliginde ve Taqiqat komitetinde izaatlarnı bermekten vazgeçtiler.

Meclis vekilleri bunı «içtimaiy ceetten faal olğan insanlarnıñ qorquzuvı» olaraq tanıylar.

XS
SM
MD
LG