Sentâbr 17 künü qırımtatarlarnıñ evlerinde keçirilgen Bulğanaq köyüniñ 3 sakinini bir qaç ay evelsi olğan turmuş ziddiyetniñ sebebinden sorğuğa çektiler.
Bu malümatına Qırım.Aqiqat mühbirine sorğuda bulunğanlarnıñ soy-sopları bildirdi.
İşbu sakinler turmuş ziddiyetniñ (dögüşniñ – muar.) şaatları olaraq sorğudan keçeler.
Soy-soplarnıñ aytqanı kibi, işbu ziddiyette zarar körgen yerli sakin uquq qorçalayıcı organlarğa arizanı yazdı, oña köre, bugün Bulğanaq köyünde tintüvler keçirildi.
İnsanlar endi bir qaç saat devamında sorğuda bulunalar, olardan daa iç bir haber yoqtır. Ana-babaları bu vaqialardan şaştılar, evde bulunalar ve balalarını qorçalamaq içün adliyecilerge muracaat etmege tüşüneler.
Sentâbr 17 künü silâlı insanlar ile politsiya maşinaları Aqmescit civarında yerleşken Bulğanaq köyüne kelip, qırımtatarlarnıñ evlerini tintemege başladı. Кöy sakinleriniñ aytqanı kibi, mayıs 3 künü Ermeni Bazarda qırımtatarlar öz lideri Mustafa Cemilevni qarşılamağa çıqqanı ile bağlı cinaiy iş çerçivesinde tintüvni dört evde keçirdiler. Tintüvniñ sebeplerinden daa biri – bir qaç ay evelsi yüz bergen turmuş ziddiyetidir.
