Link açıqlığı

İşğal etilgen Qırımda qırımtatarlarnıñ evlerinde tintüvler devam ete. Sentâbr 17 künü silâlı insanlar ile politsiya maşinaları Aqmescit civarında yerleşken Bulğanaq köyüne kelip, qırımtatarlarnıñ evlerini tintmege başladı.

Bunı Qırım.Aqiqat saytınıñ mühbirine köy sakinleri bildirdiler.

Olarnıñ aytqanı kibi, mayıs 3 künü Ermeni Bazarda qırımtatarlar öz lideri Mustafa Cemilevni qarşılamağa çıqqanı ile bağlı cinaiy iş çerçivesinde tintüvni dört evde keçirdiler. Tintüvniñ sebeplerinden daa biri – bir qaç ay evelsi yüz bergen turmuş dava oldı.

Köyge altı politsiya maşinası ve avtomatları olğan insanlar ile bir «GAZel» keldi. Tintüvler 2-3 saat devam ete edi, silâ, afyon ve Rusiye Federatsiyasında yasaq etilgen islâm edebiyatını qıdırdılar.

Sakinlerniñ sözlerine köre, evlerde bir şey tapmadılar. Faqat, uquq qorçalayıcılar er bir evden birer insannı özleri ile alıp kettiler.

Şaatlarnıñ aytqanına binayen, şeylerni ve bostanlarda öskenlerni baqıp çıqa ediler. Bir kitapta grivnalar tapılğanından soñ, saiplerden Qırım ruble alanında olğanda, evde grivnalarnıñ saqlanuv sebebi aqqında soradılar. Tintüvden soñ, qomşularnıñ aytqanı kibi, qız özüni yaramay duydı, yüregi ağırdı. Aile azalarından birisini turmuş ziddiyetniñ şaatı olğanı içün rayon bölügine alıp kettiler. Onı, ekstremist edebiyatnıñ tesiri altında olıp, işbu ziddiyette iştirak ete bilgeninde qabaatlaylar.

Silâlı insanlar köyni endi terk ettiler, yerli sakinler öz açuvını gizlemeyler.

Qırım.Aqiqat bergen malümatına köre, saba sentâbr 16 künü qırımtatar milliy Meclis azası Eskender Bariyevniñ evinde de tintüv keçirildi, neticede onıñ bilgisayarı tutıp alındı.

Bundan soñ qırımtatar milliy Meclis binasını da sarıp aldılar, anda tintüvler keçirildi.

Qarasuvbazar regional Meclisiniñ reisi Mustafa Asabanıñ evinde de tintüvler keçirildi, bundan soñ onı sorğuğa alıp kettiler.

Qırımnıñ içki işler nazirliginde ve Taqiqat komitetinde izaatlarnı bermekten vazgeçtiler.

Meclis vekilleri bunı «içtimaiy ceetten faal olğan insanlarnıñ qorquzuvı» olaraq tanıylar.

XS
SM
MD
LG