Qırımtatar milliy Meclis binasına FSB ve mahkeme hadimleri keldiler. Olar «Qırım» Fondı» hayriye teşkilâtınıñ reisi Riza Şevkiyege mahkeme qararını oqudı ve mülkni müürlemege azırlanalar.
Bunı Qırım.Aqiqat saytına Meclis kâtibiyetiniñ reberi Dilâver Akiyev bildirdi.
«Qırım» Fondı»na ait olğan mülkni müürlecekler, ğaliba. Tafsilâtlı malümat daa yoqtır. FSB ve mahkeme hadimleri, pek çoqlar, kabinette bulunıp, er şeyni qayd eteler», – dedi Akiyev.
Onıñ malümatına köre, sentâbr 16 künü keçirilgen tintüv vaqtında olğanı kibi, Meclis binasına kimseni kirsetmeyler ve içeriden kimseni yollamaylar. Akiyev şunı da bildirdi ki, Şevkiyev özüni yaramay duydı, oña acele yardımnı çağırdılar.
Qırımtatar milliy Meclisi «Qırım» Fondı»na ait olğan binada yerleşe.
Qırım.Aqiqat bergen malümatına köre, saba sentâbr 16 künü qırımtatar milliy Meclis azası Eskender Bariyevniñ evinde de tintüv keçirildi, neticede onıñ bilgisayarı tutıp alındı.
Bundan soñ qırımtatar milliy Meclis binasını da sarıp aldılar, anda tintüvler keçirildi.
Qarasuvbazar regional Meclisiniñ reisi Mustafa Asabanıñ evinde de tintüvler keçirildi, bundan soñ onı sorğuğa alıp kettiler.
