İşğal etilgen Aqmescitte qırımtatar milliy Meclisinde doquzıncı saat tintüv keçirile.
Qırım.Aqiqat saytınıñ mühbiri bergen malümatına köre, bina alâ daa sarılğandır. Bina kirişinde silâlı insanlar tura. Bunıñ ile territoriyada OMON ve politsiya hadimleri tura.
Şimdi binanıñ içerisinde bulunğan «Qırım» Fondınıñ» reisi Riza Şevkiyev adliyecini çağırdı. O, Meclis binasına kirecek edi. Amma onı kirsetmediler.
Adliyeci Cemil Temişev Qırım.Aqiqat saytınıñ mühbirine şunı bildirdi ki, silâlı insanlarnıñ areketi bütünley qanunsızdır.
«Riza Şevkiyev qanunsızlıq olmasın dep, maña taqiqat areketleri vaqtında anda bulunmağa rica etti. Adliyeciniñ yardımı – er bir insannıñ aqqıdır. Añlaşılmağan sebeplerden binağa kirmege bermediler. Nasıldır bir qanuniy saçmalıqtır, daa yarım, bir yıl evelsi bunı tasavur etip de olamaz edik. Elbette ki, olarnıñ bu areketlerine itiraz kösterilecek. Biz olarnıñ areketlerine ya Rusiye Federatsiyasınıñ, ya da insan aqları boyunca Avropa mahkemesine cevap olacağına ümüt besleymiz. Eger de adliyeciniñ mahsus aqları bozulsa, adiy insan aqqında ne aytmalı? Anda kim buluna, nasıl insanlar, ne sebepten ve nasıl vesiqalarnı qıdıralar, – cemaatçılıq, qırımtatar milliy meclisine bular bildirilmey», – dep haber etti Qırım.Aqiqat saytına Cemil Temişev.
Aynı zamanda, Meclis binasınıñ üzerinde Ukraina devlet bayrağı ve qırımtatar milliy bayrağı ep asıla.
Sarılğan binanıñ yanında qırımtatarlar toplandı. İnsanlar bir-birinden uzaq mesafede turmalı, çünki olarnı qanunsız mitingde iştirak etkenlerinde qabaatlay bilecekler.
Belli olğanı kibi, sentâbr 16 künü Aqmescitte qırımtatar milliy Meclis binasını silâlı insanlar sarıp aldı, mında tintüvler keçirile. Qırımnıñ içki işler nazirliginde ve Taqiqat komitetinde izaatlarnı bermekten vazgeçtiler.
