Link açıqlığı

Qarasuvbazar meclisiniñ reisi Rusiye pasportını almağanı «politsiyada» meraq doğurdı


Sentâbr 16 künü evinde tintüv keçirilgen Qarasuvbazar regional meclisiniñ reisi Mustafa Asabanı sorğudan soñ azat ettiler.

Bunı Mustafa Asaba Qırım.Aqiqat saytına bildirdi.

«Tintüvniñ keçirilgeninden soñ politsiya hadimleri keldi. Olar maña nezaket ile muracaat ettiler. Rayon bölügine subetke barmağa rica ettiler. Protokolnı tizmediler. Rusiye Federatsiyasında yasaq olğan edebiyat aqqında tarif ettiler»,– dey regional meclisniñ başı.

Bu vaqianı «qorquzuv areketi» olaraq tanıy.

«Ciddiy bir şey yapmağa istegen olsalar, yapar ediler. Amma özlerini ğayet sakin alıp bardılar. Misal içün, Rusiye vatandaşınıñ pasportını almağanımnen meraqlandılar, Rusiyeni ne sebepten begenmeyim kibi suallerni qoydılar. Men ise: ne sebepten onı begenmegenimni bugün özü kösterdi, degen cevabımnı qaytardım. Bunı qaydan bileler soradım. Olar: bilemiz, malümatımız bar, dep ayttılar. Men: «Siz meni pasportnı almağa mecbur etesiñizmi? Daa vaqıt bar, men tüşünip baqarım, dedim»,– dep tarif etti o.

Bir saat devam etken subetten soñ, Mustafa Asabanı azat ettiler.

Qırım.Aqiqat bergen malümatına köre, saba sentâbr 16 künü qırımtatar milliy Meclis azası Eskender Bariyevniñ evinde de tintüv keçirildi, neticede onıñ bilgisayarı tutıp alındı.

Bundan soñ qırımtatar milliy Meclis binasını da sarıp aldılar, anda şimdi tintüvler keçirile.

XS
SM
MD
LG