Sentâbr 16 künü Qarasuvbazar regional Meclisiniñ reisi Mustafa Asabanıñ evinde de tintüvler keçirildi, bundan soñ onı sorğuğa alıp kettiler.
Bunı o Qırım.Aqiqat saytına bildirdi.
Regional Meclisniñ reisi aytqanına köre, FSB hadimleri oña saba erte kelip, tintüvni keçirmege mahkeme izinini kösterdiler. İşbu tedbir mayıs 3 künü qırımtatarlar öz lideri Mustafa Cemilevni Ermeni Bazar memuriy sıñırına qarşılağanı ile bağlı olğanını bildirdiler.
Tintüvniñ neticesinde diniy ve qırımtatar milliy areket aqqında risalelerni tapıp aldılar.
Tintüvden soñ adamnı sorğuğa alıp kettiler. Onıñ ile telefon bağ alâ daa yoqtır.
Qırım.Aqiqat bergen malümatına köre, saba sentâbr 16 künü qırımtatar milliy Meclis azası Eskender Bariyevniñ evinde de tintüv keçirildi, neticede onıñ bilgisayarı tutıp alındı.
Bundan soñ qırımtatar milliy Meclis binasını da sarıp aldılar, anda şimdi tintüvler keçirile.
